Bella musa amorosa (Pietro Canu).

Scritto da carlo moretti

Pietro Canu era un celebre poeta e improvvisatore di Chiaramonti. Analfabeto, pastore di professione favoriva nelle sue poesie i temi allegorici. Venne ucciso nel dicembre del 1845 a soli 57 anni. Vi proponiamo questa sua poesia sperando di fare cosa gradita.

Bella musa amorosa

Bella musa amorosa

chi fis de puru amore su cuntentu,

cun boghe lastimosa

de unu coro ammustra su lamentu,

sias sa pius dolorosa

in narrer tantu dolu et patimentu:

s’amore et s’allegria

depone pro ti estire de agonia.

Como chi privu so

de visitare cudda chi hap’in coro

non pius allegru no

cherz’essere, ca mi mancat sa chi adoro;

piangher depo però

de continu unu perdidu tesoro

chi fit veru cuntentu

chi l’amo pro mi dare pius turmentu.

De la faeddare ancora

s’accasu l’incontrere m’hant privadu,

edducas a dogn’hora

dep’esser dai piantu accumpagnadu

intro de domo et fora:

mi dent giamare coro isfortunadu,

luttu solu et tristura

ch’est abberta pro me sa sepoltura!

Anzis cun tirannia

m’hant ancora sa vista limitadu

ca si la miro ebbia

committo unu terribile peccadu;

cale est sa vida mia

como ch’est reduida ai cust’istadu!

Piangher depo continu

ca so de sos pius tristos miserinu.

Prite, ojos, non pianghides,

s’amante non mirades tantu et tantu?

Prite non bos finides

in lagrimas amaras et piantu?

Comente resistides

in osservare custu veru incantu?

S’amante no est fidele,

ancora issa est ingrata et est crudele.

Su coro m’hat leadu

chi mi lu desit pro lu cunservare,

a un’ateru l’hat dadu

a mie non l’hat cherfidu lassare;

so istadu ingannadu

nemancu ispero de mi lu torrare,

eppuru ancora l’amo

anzis l’istimo pius et pius la bramo.

Grave et forte lamentu

ripeter mi cumbenit et dolore.

Ah! lassa su cuntentu!

Sighi, musa, su piantu et su furore;

solu de ispaventu

imprime su caratter’et terrore

ai custu coro amante

ch’amende no est amadu, et est costante.

Gustos et allegrias

andade a sos de me pius fortunados,

delissias non pius mias

lassade in dolu sos pius desdicciados,

umbrosas cumpagnias

sighide sos amantes affannados.

Un’amante ingannadu

det esser de tristura accumpagnadu.

Pedras de s’appusentu

ch’intendezis sa fide chi m’hat dadu!

cudda chi pro turmentu

como m’hat in su totu abbandonadu,

formade sentimentu:

cun custu coro tristu et affannadu

non mi lassedas solu

in cussa dura pena et disconsolu.

O fide traighida!

pius in te non si fundat s’isperanzia:

giuresit attrivida

fìdelidade et amore cun constanzia,

ma sa fide est finida,

non si ponet pius in osservanzia;

o fide, largos rios

de piantu forma a sos lamentos mios!

Logos tantos et tantos

ch’intesu hazis s’amore professadu,

benide totu cantos,

pianghide cun custu isfortunadu,

formade tristos piantos,

cunfortade unu coro isventuradu;

bois nessi accudide

ch’ischides cust’amore, et pianghide.

Amorosas miradas

ch’ischides de su coro sos secrettos

dai nois duos dadas,

chi penetrezis in sos nostros pettos,

bois sezis istadas

sas chi formezis sos nostros affettos,

bois ancora sos dannos

benide a supportare, e i sos affannos.

S’eco puru affannosa

ripetat de un’amante sos clamores,

cun boghe lastimosa

accumpagnet sas penas et dolores;

s’aggiret luttuosa

ispirende tristuras et terrores

a mie disdicciadu

ch’amo s’amante chi m’hat ingannadu.

Et tue, ingrata amante,

non m’has a cherrer dare unu confortu?

Sias fida et costante

ai cuss’amante ch’has abbertu portu,

ma si non ses diamante

procura ai custu piantu un’accunortu

nessi cun t’ammentare

de chie de fide has cherfidu mancare.

Ma ancoras ch’incostante

mi siat custa ninfa chi hapo amadu

l’hap’esser sempr’amante

fidele ca su coro m’hat ligadu,

a issa solu costante

d’esser in tantu piantu hapo juradu:

l’amo infida et l’adoro

a issa in tantu piantu de su coro.

PIETRO CANU

Condividi su Facebook