Chiaramonti, il portale delle vostre idee » gara poesia

S’ammentu de Giuanne Seu

angelino tedde — Tue, 21 Sep 2010 11:56:50 +0000

Pro s’ammentu de Giuanne Seu sunt bennidos a Tzaramonte Mario Brunu Agus de Gairo, Zuseppe Porcu de Irgoli, , Zuseppe Donaera de Ossi, Nigola Farina de Orgosolo, Sevadore Ladu di Sarule, Paolu Usai de Gairo, Sevadore Iscanu de Othieri, Costantinu Sanna de Perfugas, at partecipadu puru Zuseppe Forrija de Tzaramonte. In su palcu su coro Murales de Orgosolo e Sevadore Patatu cun Paolu Pillonca chi ant faeddadu de sa vida e de sa poesia de Giuanne Seu. Pro la narrere cun Paolu Pillonca sa poesia de Seu fit sustantziosa, sos versos fint flumtes e sa oghe bene intonada e armoniosa.

Puru sos poetes ant cantadu de sa vida, sas virtudes de poete de Giuanne Seu. Parizos l’ant connoschidu, ateros l’ant iscultadu dae sas registratziones, totus l’ant apidu geniale.

Gianne Seu est e at a restare unu de sos mazores poetes improvisadores de Sardigna. Totus sos poetes ant manifestadu de creere chi issu como continuat a cantare in Chelu cun sos ateros poetes chi sunt passados a su Regnu Divinu.

Allegradi Giuanne de s’ammentu

Chi mesa Elicona t’at cantadu

E totu Tzaramonte meda attentu

Cun grande passione t’at pessadu.

Non si los giughet de tzertu su entu

Sos versos tuos chi nos ant incantadu

Ant a durare pro milli annos chentu

O rosinzolu chi innoghe ses bistadu.

Cando curre su entu in sas carrelas

Sa oghe tua zocat in sas domos

Pro dare paghe a sos biddanos tuos.

In custu mundu pienu de ranzelas

Non bastant de sos vates tantos tomos,

Recreu nos dant sos cantigos tuos.

Cantadores a poesia – Peppe Sozu, Antoni Piredda e Juanne Seu a Bortigali nel 1959 – Duinas.

carlo moretti — Fri, 02 Oct 2009 09:03:16 +0000

Ecco un’altro scorcio della nostra storia poetica chiaramontese, un duello in versi fra prestigiosi poeti come il nostro Juanne Seu, Antonio Piredda e Peppe Sotgiu. Vi auguro buona lettura.

Bortigali 1959 PEPPE SOZU – ANTONI PIREDDA – JUANNE SEU

DUINAS

1. Sozu

. . . . . torradu su tenore

de duina faghimos unu giru

2. Piredda

Su tenore ja paret un’ammiru

chi presentat un’òrganu mazore.

3. Seu

Ma s’est purgadu totu su laore

como che frundiamus su chiliru.

4. Sozu

Tue già paris, Seu, in cust’isetu

ma ancora su trigu no est netu.

5. Piredda

E s’esserat su trigu inetziadu,

mi’, su chiliru non deves frundire.

6. Seu

Si nd’est fina su pópulu istracadu,

in su letu disizat a drommire.

7. Sozu

Da chi sa ratzione apo buscadu

no apo mancu ‘e s’ijerru a timire.

8. Piredda

Ténelu contu su chiliru tou

ca ti podet selvire a trigu nou.

9. Seu

Como lu apalto su chiliru meu,

l’apo a tratare a da chi ‘enit s’ora.

10. Sozu

Si sa mietitrèbbia l’at Seu

su chilireddu che l’imbolat fora.

11. Piredda

Ténelu contu su chiliru intreu

ca bisonzat a dogni purgadora.

12. Seu

E tue si as chiliros pro sa gara,

car’Antoni, a cras sero los prepara.

13. Sozu

Ma chiliros, ne truddas ne truddones

como no si nd’at bidu pius in giru.

14. Piredda

Però Juanne Seu su chiliru

at bidea ‘e lu fagher a bucones.

15. Seu

Creo ch’a-i cust’ora in su retiru

sun finas in campagna sos puzones.

16. Sozu

Mai s’’iat ne chiliru e ne sedatu

ma bastet chi s’agatet pane fatu.

17. Piredda

Dadu chi a cantare t’an batidu

canta, Juanne, si nde tenes gana.

18. Seu

Canto mancari cun rima metzana

però mi colco cando so sonnidu.

19. Sozu

Su pane ‘onu est sempre saboridu

po chi lu ‘aten dae terra lontana.

20. Piredda

A la finire no sias pressadu,

canta in sa gala ca ja ses pagadu.

21. Seu

A ischis chi no so pagadu ancora

e ne so trabagliende in cantieri.

22. Sozu

Ma ite contat tempus e ne ora

po s’improvisadore ‘e mestieri?

23. Piredda

Po ti pagare in moneda sonora

bisonzu chi trabaglies volenteri.

24. Seu

Pro istanote est finidu s’iscopu

. . . . . . . . . . . . . . . .

25. Sozu

Ma sos ch’ìstana tota note fora

sun sos chi no an letu e ne dimora.

26. Piredda

A chie at piaghere ‘e iscultare

no devides su gustu proubire.

27. Seu

Ma cuddos chi ana gana ‘e si drommire

chi frimmen no lo podes obbligare.

28. Sozu

A da chi ‘enit s’ora ‘e paltire

ognunu si che devet aviare.

29. Piredda

Canta, Juanne, cun sos sensos fissos:

no ti deves drommire prima ‘e issos.

30. Seu

Eo ja canto cando mi piaghet

ma no chelzo controllos che Piredda.

31. Sozu

Cussa mi parit una brighighedda

chi ne caldu ne fritu inoghe faghet.

32. Piredda

Ma mi paret Juanne chi s’atraghet,

abbesu chi tochende lu est sa sedda.

33. Seu

Si mi piaghet drommo o cant’arreu

ma no ses tue su padronu meu.

34. Sozu

Juanne ‘atidu si at s’isvegliarinu

no ti podes drommire a sonn’isoltu.

35. Piredda

E dadu chi mi tenes a vicinu

a ti fagher cantare so dipoltu.

36. Seu

Ma si, Piredda, no istas a poltu

ti fato ruer in mesu caminu.

37. Sozu

Non bos drommides bois duos ebbia,

drommidu a totu at sa ‘ostra ninnia.

38. Piredda

Pensa chi a Piredda a fagher rùere

no sunu proas de Juanne Seu

39.Seu

Si si ponet in motu s’ozu meu

Pireddas che a tie faghet fùere.

40. Sozu

Ambos ja bos ponides in peleu,

cherides dare su velenu a sùere.

41. Piredda

Tue de ozu as sa pessone lija

no b’est su tantu de una frommija.

42. Seu

Ja l’isco ‘e ozu chi so iscadente

però coraggiu nde tenzo ‘e avassu.

43. Sozu

Ja no che cheren ne ozu e ne grassu

como a ungher sa botas a sa zente.

44. Piredda

Cun totu grassu chi no nd’at niente

m’abbizo rallentende ses su passu.

45. Seu

A Piredda mancari mannu-mannu

s’ozu meu l’ingrassat totu s’annu.

46. Sozu

Sos domiciliados in tzistade

bio non cheren tenner paghe ancora.

47. Piredda

O Peppe Sozu, no ch’’essas a fora

prite bi chi nd’at de dogni calidade.

48. Seu

Lassa ‘e Piredda s’arma traitora

s’est ch’istimas sa tua libbertade.

49. Sozu

Prite in palcu bos dades a sas manos

ja chi contades giai paesanos?

50. Piredda

E poite mi naras traitore

a da chi totu ti so nende in cara?

51. Seu

Tue no tenes un’ànima avara

ma s’arma tua est ch’at tropu valore.

52. Sozu

Cherides fagher una figura rara

ma mi parit dognunu peldidore.

53. Piredda

Bell’est cantende chi laras abbelzas

ma a mie traitore no lu nelzas.

54. Seu

No fia nende traitore a tie,

sun traitoras sas armas ch’impitas.

55. Sozu

. . . . . . . . . . . . . . . . . .

. . . . . e dae poi ite ti agìtas.

56. Piredda

Mezu sa retidùdine chi jitas

e no ti fetas ne fogu e ne nie.

57. Seu

Tue ch’atacas gherra in dogni logu

‘etachelas sas armas in su fogu.

58. Sozu

Sezis poninde fogu a note intrea

ma no allumat mancu su furreddu.

59. Piredda

Ammentadinde ‘e sa prima cadrea,

it’as cantadu in su primu faeddu.

60. Seu

Sozu ch’est mannu cant’unu casteddu

ma istanote li damus pelea.

61. Sozu

Da chi de fogu azis paga provista

no bos brujades calchi pibirista.

62. Piredda

Seu mi paret unu punghe e fue

ca in logu no tenet arresetu.

63. Seu

Però pro como, Antoni, ista chietu

no siat chi si peset calchi nue.

64. Sozu

A mie parit sa gulpa l’as tue

chi lu ses agghejende pro dispetu.

65. Piredda

E tue puru pianu-pianu

tiras sa pedra e ti cuas sa manu.

66. Seu

Ponide mente ca est ora talda

e la finimus totu in paghe santa.

67. Sozu

Nono, chi sa minestra da ch’est calda

che cheret mandigada totacanta.

68. Piredda

E-i sa lanza poesia salda

nde la devo bogare dae pianta.

69. Seu

Si che l’ingullis a unu bucone

ti podet fagher indigestione.

70. Sozu

Ma custu ja est brou ‘e puddighinu,

si podet narrer lezeru unu pastu.

71. Piredda

Deo de brou no li leo tastu

mi paret unu fenu leperinu.

72. Seu

Piredda no si fidat a vicinu,

che-i sos pastores iscudet a crastu.

73. Sozu

A da chi no b’at peta in sos mercados

bos ana fatu su brou ‘e dados.

74. Piredda

No selvit a buddidu e ne arrustu:

si passat, podet passare a casciola.

75. Seu

Cun sos rassos bi leo pius gustu

pro chi no sian in sa catzarola.

76. Sozu

Da chi de abba bi est su tantu giustu

ja che passat po una ‘olta sola.

77. Piredda

Po chi Juanne Seu fetat brou

dali unu pagu ‘e su grassu tou.

78. Seu

Già isto ‘ene comente mi agato,

non so pensende pro sa tripa anzena.

79. Sozu

Deo de brou gai mi nde atato

però no naro chi apo fatu chena.

80. Piredda

De peta ‘e fadigada ite nde fato

ch’est su matessi che papare rena?

81. Seu

Tra Sozu cun Piredda in sa pessone

faghen tres cuintales de sabone.

82. Sozu

E a su mancu su sabone ‘onu

ti podet samunare manu e cara.

83. Piredda

E-i su sabone est una cosa rara

poi chi no si ‘endet a s’indonu.

84. Seu

Mi paret ch’istanote in custa gara

ti faghimos teracu dae padronu.

85. Sozu

Tres cuintales de sabone cotu

cheret po samunare a tie etotu.

86. Piredda

Tra su sabone sou e-i su meu

fintzas a tie ti est netzessàriu.

87. Seu

E a sabone gai so contràriu

ca no est bonu a samunare a Seu.

88. Sozu

No apo ‘e lavandaia s’impreu,

deo che passo in àteru binàriu.

89. Piredda

Ja poden ingrassare dae inie

su cannaitu ‘e apicare a tie.

90. Seu

Eo pro istanote no m’impico

ca su motivu no be-i est ancora.

91. Sozu

Cussa ‘idea mala che ‘oga a fora

ca si t’idera sas manos ti sico.

92. Piredda

Cun su sabone meu si mi fico

s’istracat fintza sa samunadora.

93. Seu

S’azis cannau cun sabones bonos

selvan a impicare sos padronos.

94. Sozu

Tando tue ses, Seu, selvidore:

non ti ses resu ancora indipendente.

95. Piredda

Aiò, Juanne, e fàghedi segnore

e arrejona de pius prudente.

96. Seu

Eo la fino sempre amore-amore

ma est su tantu ‘e trampare sa zente.

97. Sozu

S’a sos padronos des cannau apòrrere

signu chi selvidore deves mòrrere.

98. Piredda

Ma no si trampan sos chi sun igue:

si no ti pagan ses trampadu tue.

99. Seu

Si b’at dinari un’iscuta agguanto

però si no mi pàgana no canto.

100. Sozu

E mezus lis naramos adiosu

e bonanote cun bonu riposu.

101. Piredda

E si ponimos sa fine a su cantu

repito bonanote ateretantu.

102. Seu

E deo si est finida s’Elicona

naro: bonu reposu e note ‘ona.

Cantadores a poesia – Peppe Sozu, Antoni Piredda e Juanne Seu a Bortigali nel 1959 – Battorinas.

carlo moretti — Tue, 25 Aug 2009 09:52:40 +0000

Riprendiamo la pubblicazione di alcuni versi, trascritti dalle registrazioni eseguite a opera di amatori durante le gare. Purtroppo stavolta è stato possibile recuperare la trascrizione ma non la registrazione, tant’è vero che anche le “batorinas” non sono complete, mi scuso con i lettori appassionati ma mi sembrava giusto riportare lo stesso, un pezzo storico della poesia estemporanea sarda.

Buona lettura.

BATORINAS

1. Sozu

A la cantamos una batorina,

ma, Bortigale, non sias ostile:

a frusciare si frusciat in cuile

ue b’at crabas e robba elveghina.

Como cantamos una batorina.

2. Piredda

Tando cantamos una batorina,

sonende sa poética campana

a chie de frusciare tenet gana

su frusciu che li ‘essat in s’ischina.

Ja chi cherides una batorina.

3. Seu

Como cantamus una batorina,

ca no cheren a fagher sa finale:

pro fagher una gara in Bortigale

est mezu a bogare cotighina.

Como cantamus una batorina.

4. Sozu

A la cantamos una batoreta,

no mi nde faghet s’ischina a un’arcu:

si nois che calamus dae su palcu

ja ‘ies chi sa zente istat chieta.

Como cantamos una batoreta.

5. Piredda

Tando cantamos una batoreta,

che ch’apera retzidu unu regalu:

si an frusciadu no est po su malu

ch’est po fagher cantare su poeta.

Ja chi cherides una batoreta.

6. Seu

Como cantamus una batoreta,

cantade naran a “piunonposso”:

si, Peppe Sozu, che falas a giosso

t’istratzan finamenta sa maglieta.

Como cantamus una batoreta.

7. Sozu

A la cantamos una noitola,

ma chie frusciat cun fatzilidade

ja no est zente pesada in tzitade,

si connoschet ch’est ratza campagnola.

Como cantamos una noitola.

8. Piredda

Tando cantamos una campagnola,

ma no frùsciana solu sos distratos:

osselva finamenta in sos treatos

ch’a frusciare lu tenen a iscola.

Ja chi cherides una noitola.

9. Seu

Como cantamus una noitola,

sa zente est airada totacanta:

chie ti narat toca e tie canta

paren truvende caddos in s’alzola.

Como cantamus una noitola.

10. Sozu

A la cantamos una paesana,

ma sos chi cantan tenen sempre a usu:

a da chi issos apretan piusu

nois tenimus pius paga gana.

Como cantamos una paesana.

11. Piredda

Tando cantamos una paesana,

no an bidea ‘e la fagher finida:

lassa chi bufet sa zente sidida

fintzas ch’abba che nd’at in sa funtana.

Ja chi cherides una paesana.

12. Seu

Como cantamus una paesana,

s’est ch’a buddire si sighit su brou

a mie mi rispetan ca so nou

ma a bois una sussa bos la dana.

Como cantamus una paesana.

13. Sozu

A la cantamos una furistera,

cheren leare sos poetas a truba:

chie si cheret sempre a conca a cuba

ja podet morrer da s’imbreaghera.

Como cantamos una furistera.

14. Piredda

Tando cantamos una furistera,

ancora est populada sa piata:

e da chi custa gara l’ana fata

la dévene godire in paghe vera.

Tando cantamos una furistera.

15. Seu

Como cantamus una furistera,

si sighides a frenare sos passos

ca sezis ambos duos caddos rassos

istanote bos ponen sa gropera.

Como cantamus una furistera.

16. Sozu

A la cantamos una bruschistriglia,

apretu no bi cheret de piusu:

si che podet betare a bentr’in susu

da chi su caddu l’apretan a briglia.

Como cantamos una bruschistriglia.

17. Piredda

Tando cantamos una buchistriglia,

tue a totus minetas su ‘anzu

per’a tie ti tratan ca ses lanzu

a atacapannu a una maniglia.

Ja chi cherides una buchistriglia.

18. Seu

Como cantamus una bruschistriglia,

si bos frimmades in mesu caminu

bos sonan in orijas su frustinu

e bessit a galopu sa pariglia.

Como cantamus una bruschistriglia.

19. Sozu

A la cantamos una batorina,

est calicunu disizende azudu

paret Juanne a suore mimudu

che chi s’apat leadu un’aspirina.

Como cantamos una batorina.

20. Piredda

Tando cantamos una batorina,

Juanne Seu, a nde faghes a mancu:

ses diventende pàllidu e biancu

che ch’aperas bufadu coramina.

Ja chi cherides una batorina.

21. Seu

Como cantamus una batorina,

eo so sempre fatende progressos

ma ‘ois duos parides arressos

che màchina chi fratzat sa binzina.

Como cantamus una batorina.

22. Sozu

A la cantamos una batoreta,

ti che ses collocada in tertza fila

ma tota note ses timindedila

che una nughe suta sa matzeta.

Como cantamos una batoreta.

23. Piredda

Tando cantamos una batoreta,

Lassa, Juanne Seu, sa mania:

tue ’e sos rassos tenes gelosia

prite ses lanzu che corru ‘e furcheta.

Ja chi cherides una batoreta.

24. Seu

Como cantamus una batoreta,

eo no timo gherra e ne buldellu

ma istanote calchi coronellu

che lu fato torrare a sa gaveta.

Como cantamus una batoreta.

25. Sozu

A la cantamos una noitola,

no so mancu pensende a marmitones:

si fin totu che Seu sos leones

no b’aiat bisonzu ‘e musarola.

Como cantamos una noitola.

26. Piredda

A la cantamos una noitola,

mezus faghe una palte decorosa

e-i sa limba mala iscandelosa

segadindela cun sa pudajola.

Ja chi cherides una noitola.

Cantadores a poesia – Masala e Seu a Seui nel 1996 – Duinas, Battorinas e Dispedida.

carlo moretti — Wed, 14 Jan 2009 13:30:53 +0000

Concludiamo con i brani seguenti, la gara poetica a Seui nel 1996 tra Marieddu Masala e Juanne Seu, alcuni giorni fà abbiamo pubblicato il secondo tema e ora per terminare vi proponiamo la fase finale con “Duinas”, “Battorinas” e sa “Dispedida”.

Oltre i versi, troverete all’inizio di ogni genere, un lettore mp3 che vi consentirà di sentire la registrazione della gara. La necessità di dividere la registrazione in tre parti, è unicamente una mia scelta, dovuta al fatto che con spezzoni di files più piccoli, sono agevolati all’ascolto anche gli utenti con linea non ADSL. vi consiglio di avviare il lettore prima di iniziare la lettura dei versi.

Buon ascolto e buona lettura.

MARIEDDU MÀSALA / JUANNE SEU

Festa de Santu Pitanu

Seui, su 4 de Austu de su 1996

DUINA

1. Màsala

Però totu finida no est s’iscena:

pesadinde pro fagher sa duina.

2. Seu

Ma custa ja est fàtzile faina,

lu poto narrer a buca piena.

3. Màsala

Ma ite note calma e serena:

manc’una foza no movet sa frina.

4. Seu

Su tempus ja est caldu in dogni logu

ma penso crasa chi sémenet fogu.

1. Màsala

Però ite promitis e assiguras

chi siat cras una die metzana.

2. Seu

Est in Saldigna tropu sa caldana

chi a dognunu est dende penas duras.

3. Màsala

Ma caldu no bi nd’at solu in Othana,

infatis che nd’at fina in sas alturas.

4. Seu

In Alghero da mesudie in susu

bi nd’at baranta grados e piusu.

1. Màsala

Da mesudie in susu est a su sero

ma sa friscura bella est su manzanu.

2. Seu

Deo lu sufro ca so antzianu

e bi at oras chi mi disispero.

3. Màsala

Capitat solu de b’andare a Alghero

pro mi che setzer in s’aeroplanu.

4. Seu

De’invece non paso mancu un’ora

prite b’at caldu in domo e peus fora.

1. Màsala

E lass’istare, Juanne, chi ole

pro passizare a vicinu a su sole.

2. Seu

Chi ti ponzas in sole ti l’afeo

invece suta ‘e s’umbra mi ponz’eo.

3. Màsala

Ja ti che setzes de cuss’umbra in suta

e podes mandigare calchi fruta.

4. Seu

Però s’edade mia bruta est cudda

antzis no papo ne fruta ne nudda.

5. Màsala

Ma como chi ch’’as példidu sas dentes

tocat chi solu ‘e s’umbra ti cuntentes.

6. Seu

Ma non poto lassare nudda a coa

ca m’apo postu dentiera noa.

7. Màsala

E si t’as postu dentiera noa

tando cun cussa addentiga sa coa.

8. Seu

Però tue ca jughes sale in tzuca

prova a mi ponner sos didos in buca.

BATORINAS

1. Màsala

Tando cantamus una batorina,

ma sos faeddos chèrene medidos:

prima ‘e ti ponner’in buca sos didos,

caru Juanne, ti ponzo un’ispina.

Tando cantamos una batorina.

2. Seu

Como cantamus una batorina,

ma eo so timende àteros dannos

e pena mi sun dende tantos annos

chi como jito su pesu ‘e s’ischina.

Como cantamus una batorina.

3. Màsala

Tando cantamos una batorina,

ti torro da Juanne a Juanninu,

e nde fat’unu bellu manichinu

e t’isponimos in-d-una vetrina.

Tando cantamos una batorina.

4. Seu

Como cantamus una batorina,

ma tue a su chi faghes ist’atentu:

da chi nde faghes un’ingrandimentu

si b’ispaventat calchi signorina.

Como cantamus una batorina.

5. Màsala

Tando cantamos una batoreta,

ja tenes mannos fizos e nebodes:

tue ses jaju insoro e ti la podes

a fronte alta e ischina ‘ereta.

Tando cantamos una batoreta.

6. Seu

Como cantamus una batoreta,

che so ‘etzu e a dare sos adios

ma so cuntentu chi nebodes mios

lean su nonnu insoro a sa bratzeta.

Como cantamus una batoreta.

7. Màsala

Tando cantamos una batoreta,

ancora cantas in mesu sos bios

e superadu as otanta istios

e sa figura la faghes discreta.

Tando cantamos una batoreta.

8. Seu

Como cantamus una batoreta,

ma cussos bantos làssalos in pasu.

Prima fia uficiale in su Parnasu

e oe so torradu a sa gaveta.

Como cantamus una batoreta.

9. Màsala

Tando cantamos una paesana,

sa modéstia, Seu, est sempre mia:

calchi ‘olta ti fato cumpagnia,

calchi ‘olta ti do finas matana.

Tando cantamos una paesana.

10. Seu

Como cantamus una paesana,

sa carriera acantu est a finire

ma sos collegas faghia timire

cando no la jughia s’alva cana.

Como cantamus una paesana.

11. Màsala

Tando cantamos una paesana,

tue istas atentu inube passas

ca tantu no as példidu sas trassas

mancari ch’epas példidu sa lana.

Tando cantamos una paesana.

12. Seu

Como cantamus una paesana,

sende giovànu che sardu cantante

non timia nemmancu s’elefante:

como timo su càntigu ‘e sa rana.

Como cantamus una paesana.

13. Màsala

Tando cantamos una noitola,

per’ancora triunfas in totue:

auguramos chi no molzas tue

prite Sotgiu nos lassat a sa sola.

Tando cantamos una noitola.

14. Seu

Como cantamus una noitola,

tue ses de sas garas su zigante:

a faghes, Marieddu, s’insegnante

e ti chilcas alunnos a s’iscola?

Como cantamus una noitola.

15. Màsala

Como cantamos una noitola,

tue ses sempre allegru che un’isposu

poi ses unu tipu coraggiosu

chi no times ispada e ne pistola.

Tando cantamos una noitola.

16. Seu

Como cantamus una noitola,

cando fia in edade giovanile

non timia nemmancu su fusile

pro ch’isparerat puru a balla sola.

Como cantamus una noitola.

17. Màsala

Tando cantamos una bruschistriglia,

ma prima fimis una barantina

e como semus metade dozina,

sempre diminuinde est sa famiglia.

Tando cantamus una bruschistriglia.

18. Seu

Como cantamus una bruschistriglia,

sutzedit males de ogni zenia

però est peus ca sa poesia

non faghet a sos sardos meraviglia.

Como cantamus una bruschistriglia.

19. Màsala

Tando cantamos una bruschistriglia,

non ses de carriera a s’aurora

però b’as aer de cantare ancora

s’inventan pro no morrer sa pastiglia.

Tando cantamos una bruschistriglia.

20. Seu

Como cantamus una bruschistriglia,

ma so pensende chi pius no giro

ma, caru Marieddu, mi retiro

e unu tapu ponzo a sa butiglia.

Como cantamus una bruschistriglia.

21. Màsala

Tando cantamos una tarantella,

in cust’amenu paisu montanu

mancu creiat santu Bustianu

chi li feteran festa goi bella.

Tando cantamos una tarantella.

22. Seu

Como cantamus una tarantella,

sos ch’an fatu sa festa tantos sunu

e isse fatat grascias a dognunu

a sos chi l’ana fatu sa capella.

Como cantamus una tarantella.

23. Màsala

Tando cantamos una tarantella,

e fini ca si pones fatu a mie

in su palcu nos at a fagher die:

cantat su puddu e ispuntat s’istella.

Tando finimos cun sa tarantella.

24. Seu

Finìmula cun-d-una tarantella,

ja chi no cheres prosighire ancora,

deo fino ma fino a-i cust’ora:

cun su puddu non so in parentella.

Finìmula cun-d-una tarantella.

DISPEDIDA

Màsala

Sos paganos chi a tie si ribbellan,

Bustianu, a su palu t’incadenan:

sas fritzas de sos arcos ti avelenan,

sas purpas e sos ossos ti masellan.

Ti lapidan, torturan e flagellan,

su corpus de piagas ti pienan,

versas su sàmbene e moris ca t’isvenan

ma sa fide ch’as pro Deus non cancellan.

Cundennadu a morte in modu tale

pro esser cunvertidu cristianu

e dae tribbunu ‘e Diocletzianu

ses diventadu ‘e Cristos generale.

Ca cun sa palma ‘e sa vitória in manu

a s’Empireu t’innaltzas imortale.

Como dae su chelu inube sese,

a ube ses pigadu a bolu ispaltu

beneighe de Seui su paese

e totu su chi tenet in su saltu.

Sémina santas grascias dae in altu

chi sas edades nde godan totas trese.

Sos menzus donos màndalis a pese

a custu cumitadu de giovanos

chi t’an fatu sa festa e sempre sanos

unu séculu tochene in sa vida.

Lis sias de tutela e de guida

ja chi in sa tua santidade crene.

Aggradide custa mia dispedida

gratzie ‘e totu e bistàdebbos bene.

Seu

S’istória nos narat, Bustianu,

chi fisti unu famosu uficìale,

e in sa corte de Massimianu

jàa li fisti custode personale.

Però sa gelosia bestiale

acusadu ti at che cristianu

e afrontadu as sa morte brutale,

retzidu as su martìriu inumanu.

Naran chi a sa muzere ‘e Nicostratu,

proite fit brivada ‘e sa favella

cun-d-una grascia faeddare as fatu.

Ma como inoghe, màrtire innotzente,

manda puru sa grascia pius bella

e beneighe dogni abbitu ‘e zente.

A chie organizadu ti at sa festa,

che una sentinella vigilante

ogni grascia chi pedin tue presta.

Ma como apo finidu su dovere,

dae Seui cuntentu mi ch’ando

e a bos saludare totus passo.

E si no apo fatu piaghere

dae su palcu perdonu domando

e in bona permanéntzia bos lasso.

Cantadores a poesia – Masala e Seu a Seui nel 1996 – Secondo tema: Muzere fea e onesta, muzere bella e disonesta.

carlo moretti — Wed, 07 Jan 2009 09:52:27 +0000

Continuiamo con le gare di poesia sarda.

Vi invitiamo a leggere e ascoltare il secondo tema della gara poetica tra Marieddu Masala e Juanne Seu a seguito del primo tema già pubblicato con il precedente articolo del 16 novembre 2008.

Oltre i versi, troverete circa ogni dieci ottave, un lettore mp3 che vi consentirà di sentire la registrazione della gara. La necessità di dividere la registrazione in tre parti, è unicamente una mia scelta, dovuta al fatto che con spezzoni di files più piccoli, sono agevolati all’ascolto anche gli utenti con linea non ADSL. vi consiglio di avviare il lettore prima di iniziare la lettura dei versi.

Buon ascolto e buona lettura.

MARIEDDU MÀSALA / JUANNE SEU

Festa de Santu Pitanu

Seui, su 4 de Austu de su 1996

Secondo tema: MUZERE FEA E ONESTA,

MUZERE BELLA E DISONESTA

1. Màsala

De su sorteggiu fatu chi m’impude

no creo in palcu a tempus propìtziu.

Benénnidu chi li nelza e lu salude

m’at a tocare e dàreli s’initziu.

Pro chi est sa bellesa una virtude

e sa disonestade est unu vitziu

ca de sa vida s’ànima gemella

como la tenzo disonesta e bella.

2. Seu

Da chi su primu tema amus finidu

reposadu mi so in sa cadrea.

Ma est un’àter’órdine arrividu

e mi nde torro a pesare a sa rea

ca un’àteru tema nde an batidu

e deo tenzo una pobidda fea.

Però cun megus solu faghet festa

ca est pobidda fea ma onesta.

3. Màsala

Tue la tenes fea e onesta

e tocat chi a issa ti agguales.

Ma tra totu sos pregios naturales

sa bellesa no est palte modesta:

m’imbìdian ca l’apo a s’ala dresta

paesanos, amigos e fedales.

Cantu bella no fit Nostra Signora!

Muzere mia est pius bella ancora.

4. Seu

Tzertu bella no est muzere mia

ca jughet in sa facia calchi nue.

Ma no est cun nisciunu a para-fue,

tenet a mie solu simpatia:

deo no mi disizo coment’e tue

ca l’as una pobidda a mesadria.

Est bella chi in su coro ponet lua

però ja l’ischis chi no est sa tua.

5. Màsala

S’ùnica cosa chi a mie at atratu

ti l’apo nadu chi est sa bellesa

e no est un’isbagliu chi apo fatu,

como li devo fagher sa difesa

però la tenzo trobeida e presa

siat in domo o fora ‘e su palatu.

Ma a boltas segat fune cun trobea

e si che fuet ma torrat intrea.

6. Seu

No est muzere mia unu fiore

e ne li faghen un’ingrandimentu.

Ma est muzere pulida in s’onore

prite mai capricios no a tentu.

Nois duos in s’altare mazore

amos fatu unu sacru giuramentu.

E issa ogni mamentu narat gai:

su giuramentu no l’afaltzo mai.

7. Màsala

Tue in sos giuramentos ses cunvintu,

gai podes drommire a sa sigura.

Muzere mia una dea ‘e figura,

su visu delicadu e distintu,

pro gai cando passo in logu istrintu

nd’imbol’in terra totu sa crisura.

A su ‘entu li paro su petorru

e mi l’infelco in sa punta ‘e su corru.

8. Seu

No est muzere mia un’aurora

però l’istimo e li tenzo rispetu.

Cando l’apo isposada e oe ancora

jà l’apo afetu e mi tenet afetu.

Ma tue cando torras dae fora

si l’agatas cun atere in su letu

in domo bi sutzedit una gherra

ca issa est in su letu e tue in terra.

9. Màsala

Ma primu ‘e faeddare atentu ista,

Juanne, prite deves meditare.

Si l’apo disonesta est un’afare

e pro cussu non so a cara trista:

ja chi triunfat sempre in dogni pista

e sa prima la ‘iden arrivare

in bidda nostra e in biddas de fora

totus la jaman s’ebba curridora.

10. Seu

Muzere mia no est sa reina

de bellesa e repito s’argumentu

ca pro la ider in-d-unu mamentu

dae Sàtana fatu at sa farina.

Però cando mi colco in s’aposentu

deo nd’istudo dogni lampadina

ca si s’amore ponimos in motu

mancari fea paret bella etotu.

11. Màsala

Tand’est che chi bi manchet sa currente,

cun s’iscuru ti tocat de cumbàtere.

Cantu muzere mia est avenente

e poi finas de bellu caràtere

chi est sempre cuntenta e sorridente

siat cun megus o siat cun àtere..

E si li dan unu ‘asu ogni tantu

no li che nd’an a segare unu cantu.

12. Seu

Muzere tua est rosa ‘e primavera

e la podes bantare su bastante.

Deo non fato peruna chimera

mancari sa bellesa ch’est distante.

Ma eo juto sa conca lezera

e tue jughes sa conca pesante:

laa podes fagher una cuntierra

ma deves caminare a conca a terra.

13. Màsala

Àteras cosas in mente ti fissa

ca cussa no cheriat mancu nada.

Cando chi ‘essit no andat a missa,

che la ‘iden in àtera contrada.

Cando ‘essimos a sa passizada

totu abbàidan a mie e a issa

pro chi naran mi faghet piaghere:

“Biad’a issu chi at cussa muzere”.

14. Seu

Tue muzere tenes a modellu

ma cheres cumpiantu, cudd’iscuru,

ca est a ti mirare unu flagellu,

ue passas no ses mancu seguru:

chie narat chi ses unu ‘itellu,

chie narat chi ses boe maduru.

Jà l’as abberu una pobidda rara

però ti faghen sos corros in cara.

15. Màsala

Tue sa fea e onesta li loda,

contr’a mie non sémines ispinas.

Lassa de una bella chi mi goda,

su modellu ‘e totu sas femìnas,

e sa disonestade ja est de moda

tantu como sun totu libbertinas.

Si l’apo disonesta no est sola

tantu dogni moderna est mariola.

16. Seu

Tue ja podes narrer cantu cheres

custa bellesa ponzèndela in motu.

E gódidì sos tuos piagheres

però jughes su coro in abbolotu.

O Mario, si totu sas muzeres

Coment’e-i sa tua fini totu

ja fini sos maridos totu mudos

no nde naro chi dian esser gai.

17. Màsala

A narrer cosas gai no ti apentes

ca mi ses dende fastìdiu e pena.

Cando leadu mi apo un’Elèna

non so pro cussu cun su fele in dentes

tantu sa domo est sempre piena,

no bi mancat amigos ne clientes

si est pro totus abbelta sa janna

e in domo b’at sempre festa manna.

18. Seu

Ja bi nd’at festas de ogni colore,

ca istranzos bi nd’at de ogni gradu.

Deo no ap’isceltu unu fiore

ma mi poto jamare fortunadu

proite cando mi so cojuadu

fia solu pensende pro s’onore.

E-i s’onore meu est sempre gai:

no b’at màchia chi lu tochet mai.

19. Màsala

Muzere mia est pomposa e galana:

cantu est bella, Seu, si l’ischeras,

chi est cojada ma paret baiana

ca sa bellesa est tra sas cosas veras:

pro ti aer leadu una befana

fit menzus chi cojadu no ti esseras.

Cando la ‘ogas a de note la ‘oga

ca a de die li naran sa corroga.

20. Seu

Ja l’ischia ch’est fea e faghet dolu

ca pius fea paret de s’istria.

Ma no mi leo perunu oriolu

antzis li tenzo sempre simpatia

ca in su pàsculu ‘e muzere mia

bi poto pasculare deo solu.

Ma tue tempos malos as connotu

ca as-una tanca chi bi paschen totu.

21. Màsala

Però no arrejones a sa tzega

cand’in palcu ti paras a sa rea.

No mi ses ne cumpagnu ne collega

ca deo l’apo bella e tue fea.

Ma intantu sa mia est una dea

e invece sa tua est un‘istrega:

sa gemella ‘e s’istrega ‘e Benevento,

si l’’ido finas deo m’ispavento.

22. Seu

Pobidda mia no m’at mai istracu

pruite no caminat a sa tzega.

Li podes narrer chi est un’istrega

però so su padronu e non teracu.

Si l’atzetas, carìssimu collega,

ti poto comporare unu serracu,

e ti nde segas calchi die ‘e festa

cussas fulchiddas chi jughes in testa.

23. Màsala

Si andas a segare cosa tosta,

Seu, b’as a bistare tota vida.

Però muzere mia est colorida,

bella paret a mie fata a posta,

pro chi si ch’andet in lìbbera ‘essida

sena mancu pedire nulla-osta.

No est nudda si no torrat a domo

chi a su mancu trancuillu dromo.

24. Seu

Deo l’apo agatada sa fortuna

e permiti repiter chi lu pote.

Sa mia ‘e bellesa no at dote

e ne jara no est che-i sa luna

però torrat sa tua a mesanote

o torrat a sas duas o a s’una.

E tue abbandonadu poverinu

prite t’est rutu in peus su destinu.

25. Màsala

Ammentadinde chi a muzere mia

sa natura ‘e bellesa l’at dotada.

Tantu coment’e issa no che nd’ada

un’àtera a li fagher cumpagnia:

si nd’’ogo como sa fotografia

totus mi naran: “Custa est una fada”.

Ma si nde ‘ogas sa ‘e muzere tua

tota Seui si ponet in fua.

26. Seu

Ti repito: no est un’aurora

però mi faghet sempre piaghere

ca l’ischit fagher su sou dovere

fintzas cand’’essit dae sa dimora.

Ma tue t’as leadu una muzere

chi l’an giamada s’ebba curridora:

istat in giru peri sos caminos

e si la setzin totu sos fantinos.

27. Màsala

L’aia nadu deo, si as-in mente,

chi l’apo bella però est lezera.

Faghet figura in d-ogni fiera

ma pro la ‘ider acudit sa zente.

S’aviat dogni tantu in continente

che turista, e in terra istraniera,

ma medas boltas partit in bulleta

e nd’’atit de ‘inari una borseta.

28. Seu

E tue invece in domo che burricu

pruite t’at tocadu sorte ingrata.

Ma ‘eo ‘e richesa no ap’aficu

pruite tenzo su tantu ‘e sa mata

e tue invece lu as nadu in piata:

muzere mia mi est fatende ricu.

Però a lu repiter mi piaghet:

custa richesa comente la faghet?

29. Màsala

No mi fetas giudìtziu nieddu,

chi ti cantes sa fea est necessàriu.

E pensa ‘e ti curregger su faeddu

si no t’’essit su pópulu contràriu.

Prima mi naraian Marieddu

e-i como mi naran signor Màriu.

Sos amantes chi tenet sun cuntentos

chi faghen fin’a mie cumplimentos.

30. Seu

Muzere tua est a totu sas alas

e tue in domo a rànzigu ‘e dentes.

Ma cun custa bellesa chi regalas

ja si la miran totus cun sas lentes.

Issa est in giru chilchende clientes

e tue, iscuru, parende sas palas.

Eo de sa bellesa isto dejunu

però non la divido cun nisciunu.

31. Màsala

Tue a muzere mia rigualda

e crìtica pro issa no nde fetas

ca pro istintu de natura est calda

pro chi no est onesta, ite ti cretas.

Como che l’apo in sa Costa Ismeralda

inube b’at atrices e valletas:

mi telefonat chi est sempre bagnende

e issa l’ischit ite b’est fetende.

32. Seu

Tzeltu bella no est muzere mia

pruite at unu dossu e visu feu.

Ti dat afetos de ogni zenia

cando ‘e s’amore faghimos s’impreu.

E cando canto in domo sa ninnia

eo la canto a unu fizu meu.

Tue chi de cantones usas tantas

cussa ninnia a chi est chi la cantas?

33. Màsala

Làssami sas ninnias a un’ala

e cosas gai no fetas ischire.

Ca sos pitzinnos non cheren dromire

tue deves passare note mala.

Cudd’est sa prima ch’intrat a sa sala

e-d-est s’ùltima poi a si ch’’essire.

Sos chi la ‘iden che ruen in susu,

no si che podene istacare prusu.

34. Seu

Deo li tenzo sempre istima fissa

pro chi bella no est che unu lizu.

Nos tucamus a cheja umpare a missa

e nos catzamus puru ogni disizu

poi cando cantamus unu fizu

ja lu cantamus umpare cun issa.

Ma tue cantas sa ninnia areste

prite no ischis mancu ‘e chie este.

35. Màsala

Ma in domo de fizos no bi nd’ada

ca no bi nd’at naschìdu, e mi peldona.

Issa est fina una brava padrona

mancari siat mesu iscapriciada.

E cantas boltas l’apo preigada!

Promitit sempre chi faghet a bona,

poi si ch’andat a si diveltire:

s’est disonesta no la dev’’ochire.

36. Seu

Naras chi t’as leadu una viola

e nas chi a dognunu est atraente

ma no la podes lassare a sa sola

pruite istat girende frecuente.

O Marieddu, si mi pones mente

ja li pones in conca una pistola.

E gai cussa rosa colorida

de passizare la faghet finida.

37. Màsala

No mi leo in sas manos su fusile

pro isparare in bassu ne in altu

ca sa bellesa la ponzo in risaltu,

sa mia est una rosa ‘e mes’abrile,

e-i sa tua invece est s’iscaltu

de totu cantu su sessu gentile.

A da chi est su risu ‘e tota s’ama

torrabbichela a su babbu e sa mama.

38. Seu

Muzere mia ja l’isco ch’est fea

e no est una rosa vellutada.

Cand’apo ‘e mi cojare tentu idea

ja mi l’apo onesta seberada,

e ti repito: pro chi siat fea

sempre contat sa mia innamorada.

E nos tenimus sempre istima fissa:

issa istimat a mie e deo a issa.

39. Màsala

Deo invece l’apo indovinada,

so cunvintu chi fatu apo un’afare

tantu cando mi dat un’abratzada

no mi piaghet a mi ch’istacare.

Benit su tempus de carrasegare,

recuet semper a sa manzanada

piena e coriàndulos e tintas:

totu supolto a dentes istrintas.

40. Seu

Nois andamus umpare a ballare

ma pensamentu no tenzo perunu.

Deves ischire sas chi onestas sunu

ja sunu totu rosas de ammirare

ca finamentas in carresegare

in sa sala non ballat cun nisciunu.

A nisciunu non faghet simpatia

e tando ballat cun megus ebbia.

41. Màsala

Ballos bi nd’at antigos e civiles

e s’esémpiu, Juanne, nd’amos bidu.

Si l’apo bella no mi so pentidu

e no chelzo chi tue a mie aviles.

Totu sos chi connoschet sun gentiles,

ofrin finas a mie unu cumbidu.

Pensamentu pro nudda no mi leo:

bi godit issa e b’isto bene deo.

42. Seu

Fin’a t’intender mi pares istranu

ca a tie etotu pones in guai.

Sa tua est una rosa ‘e su ‘eranu

però ‘e viscios nde tenet assai:

pro no leare una muzere gai

mezus ch’esseras istadu ‘ajanu.

Solu pro gulpa ch’a issa as connotu

ses diventadu su risu ‘e totu.

43. Màsala

Lassa chi deo puru ria e cante,

ma est sa tua una bufonatura.

Ca t’as leadu un’ischeltzu ‘e natura

dae sa mia la pone a distante

chi s’at leadu fina una vitura

e l’at pagada, Juanne, in contante.

E mi passitzat a su sou fiancu

e deo sen’ispender mesu francu.

44. Seu

Deo leadu no m’apo una dea

però si ‘alet cantu unu tesoro,

antzis ti poto narrer chi l’addoro

ca no m’at postu in ancas sa trobea.

Sa mia est sa mia tot’intrea

e che la tenzo sempre intro su coro.

Sa tua est bella e faghet simpatia

ma no est però a tie in cumpagnia.

45. Màsala

Ma permiti, Juanne, chi conclua

e faghe tue puru finitia.

Chie at de si cojare bramosia

devet fagher sa volontade sua:

chi si la chilchet bella che i sa mia

e chi siat onesta che-i sa tua.

Bellesa e onestade den cumbènnere

ma no est sempre chi si poden tènnere.

46. Seu

Finimus cust’iscena curiosa

però ja bi cheriat in sa festa.

Ja est bona sa fémina che rosa

pruite ponet sos grillos in testa:

però pro una bella capriciosa

est mezus una fea ma onesta

ca pruite s’onore ti sufragat

e no bi nd’at tesoro chi lu pagat.

Cantadores a poesia – Masala e Seu a Seui nel 1996 – Primo tema: Manu, Oju.

ztaramonte — Sun, 16 Nov 2008 16:23:46 +0000

Continuiamo con le gare di poesia sarda.

Vi invitiamo a leggere e ascoltare il primo tema della gara poetica tra Marieddu Masala e Juanne Seu, iniziata con il precedente articolo del 1 novembre.

Buon ascolto e buona lettura.

Carlo Moretti

MARIEDDU MÀSALA / JUANNE SEU

Festa de Santu Pitanu

Seui, su 4 de Austu de su 1996

Primo tema: MANU, OJU

1. Màsala

. . . . . . . . . . . . . . .

pasadu puru pro calchi minutu,

ma tenz’’e presentare s’interessu,

s’argumentu ch’in manos mi nd’est rutu,

isperantzosu chi apat sucessu

e chi triunfet e chi diat frutu.

Ja chi sa manu ap’in parte e in sorte

indispensàbile, utile, prus che forte.

2. Seu

Amus finidu sa prima faina

cun-d-un’ischertzu o una bagatella.

Como nos an passadu una foglina

e nos l’amos divisa in cumonella.

A mie tocat una lampadina

ma est sa lampadina pius bella:

est s’oju chi mi servit de guida

ma in totu sas oras de sa vida.

3. Màsala

Cust’est su primu tema de sa gara

pro custa ricurréntzia festosa.

As una lampadina luminosa,

s’est luminosa sa lughe dat giara

però cantu sa vista, Seu, est cara

sa manu ateretantu est operosa

como chi sun sas tuas sas ojadas

e-i sas mias sun sas manizadas.

4. Seu

Sa manu fatu at calchi concuista

pruite tratat dogni ferràmenta.

Est sa chi lassat sa banca cuntenta

prite dat a dognunu sa provista,

per’a unu ch’est brivu ‘e sa vista

lu jughet aterunu a manu tenta

e ne bratzat sa manu e ne s’ispassat

prite no bìdet mancu inue passat.

5. Màsala

Isperamos ch’andende, Seu, rutu

no t’’ida da inoghe a pagu tretu

proite deves jugher s’oju allutu

chi no bi apat mancu unu difetu.

Per’a boltas lu serras ca est brutu

e-i sa manu ti lu torrat netu

e lìmpidu comente s’aurora

cando nde ‘ogas sa brutura fora.

6. Seu

O Mario, permiti chi ti conte

ma che cherzo a Colombo ponner susu.

Issu fit chena ‘idere orizonte,

s’ecuipaggiu sou fit delusu,

e da chi s’oju che at miradu susu

at nadu a boghe manna: bido monte.

Però est s’oju chi at fatu s’omaggiu

ch’at calmadu su sou ecuipaggiu.

7. Màsala

Lassa su mare calmu e in tempesta,

de cussu regnu non so in disizu.

Ma ammentadinde: sa manca e sa dresta

òperas raras nde ‘ogan a pizu:

a boltas s’oju t’est dende fastizu

però, Juanne, in fastizu non resta.

Fagh’una cosa, pianu –pianu,

carìgnalu e l’iscrafe cun sa manu.

8. Seu

L’isco sa manu segat pedra e roca

ca est in sos trabaglios de continu

però s’oju no est cosa picoca

si cunsidèras, Mario, tantinu.

Da chi faghes s’amore a sa picioca

tue li faghes un’ochïolinu.

Est s’oju chi la mirat e disizat

e-i sa zente mancu si nd’abbizat.

9. Màsala

Cue ‘e sa vista, Seu, t’impadronas:

su chi pia(n)ghet cun s’oju distinghes

ma ses cuntentu a da chi l’istringhes:

non ti naro l’iscude o la sona,

cando l’assazas una cosa ‘ona

finamenta sos didos ti nde linghes

chi cun sa limba los as aferrados

e lu podes fagher a ojos serrados.

10. Seu

Est s’oju su chi chilcat sos tranellos

in sos logos vicinos o lontanos.

In prima ‘e la tocare cun sas manos

sos ojos mira si sun pinnadellos:

tue miras a issa a ojos sanos

e la miras si jughet ojos bellos.

Si cuntenta sa vista non ti faghet

mancu la tocas ca non ti piaghet.

11. Màsala

So cuntentu a sa manca chi mi sìes,

deo a sa dresta tua mi colloco.

Celtu pro la otènnere non la ‘oco

si li das un’ojada e la sorries

ma tue ses cuntentu ca la ‘ies

e deo so cuntentu ca la toco.

Da chi li ch’apo postu manos susu

est cussu su chi piaghet de piusu.

12. Seu

………………………………..

però sa manu est barbara e tirana.

Deo ti naro: si non ti piaghet

finas sa manu che restat lontana,

e penso, Marieddu, chi t’istraghet

a da chi bruta miras un’ajana.

Si no est aclarada a s’oju tou

li naras “baediche” a contu sou.

13. Màsala

Cun s’oju ch’as in tema incue resta,

cuntempla totu cun atentzione.

Però sa zente at devotzione,

pro unu santu organizat sa festa

poi sa santa beneditzione

invocat da sa sua manu dresta.

Nàrami cale ‘e sos santos in lista

t’at mai beneitu cun sa vista.

14. Seu

Deo tzitare nde chelzo un’ebbia

ma chelzo chi m’iscultes in cust’ora:

l’at morta sa pagana tirannia

send’e sa religione traitora.

Fàghem’ischire pruite a Lughia

l’an giamada ‘e sa vista protetora

e oe in dogni logu est-invocada,

però l’an pro sa vista onorada.

15. Màsala

Lughia, fit una bella pitzinna,

comente una rosa in primavera,

chi sa ninnia sa mama sintzera

l’at cantad’a minore, ninna-ninna.

L’an fatu calchi istàtua ‘e linna,

de marmu, ammentadinde, e puru ‘e chera.

prite a santa Lughia sende in vida

nàrami cando cun ojos l’as bida.

16. Seu

Santa Lughia, est una ‘e sa ancellas

e nde cunservan totu sos momentos.

Però nara ‘e sas iscobeltas bellas

chi sun fatende sos mezus talentos:

ammentadinde chi cun istrumentos

cheren mirare fina sas istellas.

Tue betas sa manu in d-ogni logu

però servis ebbia ‘e disaogu.

17. Màsala

No che so pro ti dare su contràriu

e ne pro fagher peruna protesta.

Però ‘e fronte a sa santa resta

cand’est de l’invocare necessàriu:

t’istringhes in farrancas su rosariu

e giunghes ambas manos, manca e dresta.

Faghe cando sos ojos ch’apat fora

tue sa santa no l’as bida ancora.

18. Seu

Non ti tratas sa manu in-d-ogni tretu

in sos trabaglios finas colossales,

però usa a sos ojos su rispetu:

ammentadinde chi sunu fanales.

E cando si in sas pupias bi at difetu

ti pones unu paju de ochiales.

Ma cando sun sos ojos fora d’usu

s’àteru restu no balet piusu.

19. Màsala

Ti disisperas chi no ti recreas,

tando abbascia sa cara e t’addolora

proite as a passare oras feas

ma sa manu est sempre operadora

ca subra ‘e sa terra a punta fora

ammétnadì chi ch’at òperas reas.

Peri sas vias e in sa piatas

non sun sos ojos sos chi las an fatas.

20. Seu

Deo li do a s’oju su merìtu

pruite mi acumpagnat fitianu

e pagu ’e neghe deo in-d-ogni situ,

siat inoghe che in Campidanu.

Si lean su giornale ogni manzànu

e leggen totu su chi b’est iscritu.

Ma si jughes in ojos una nue

no m’as a narrer ite legges tue.

21. Màsala

Cantu ti ‘enit a sos pensamentos

tot’improvisas serenu-serenu.

Ma sonare si podet istrumentos

e isfoglias su giornale lenu-lenu.

S’in sa ‘uca si b’intrat alimentos

est ca cheret s’istógomo pienu.

E sun sas manos chi t’aporrin totu,

su chi mandigas cru’ e su ch’ast cotu.

22. Seu

Si no ti leas, Mario, arrennegos

sa veridade ti naro bianca.

Cussu lu podes narrer a sos legos

no lu nelzas a mie a facia franca:

sos alimentos chi pones in banca

creo fatos non sun dae sos tzegos.

Prite si pones sas manos in motu

jà sun sos ojos chi ti mustran totu.

23. Màsala

Ma chi sa manu tenet campos vastos

l’ischin sos coltos e l’ischin sos legos

ca bi nd’at chi sos ojos an guastos,

sunu in s’iscuru in totu ca sun tzegos

ma ocupados sunu in impiegos

e impitan su tatu cun sos tastos

sena ‘ìere e sena abbaidare

e si procuran su tantu ‘e campare.

24. Seu

Da chi ses tzegu in impicios ti pones,

ma nàrrere una cosa ti cheria.

No est sutzessu in sa Saldigna mia

ma est sutzessu in àteras regiones:

una pro comporare una pupia

at ispesu dughentos milliones.

At ispesu sos suos benes raros

prite sos ojos sunu tropu caros.

25. Màsala

Tue apitu a sos ojos b’istas,

no at a esser niente in debbàdas.

Per’in su cursu ‘e totu sas annadas,

ammenta, in domo bi cheret provistas:

las produen sas terras coltivadas

e s’interessan sas manos abbistas.

Non sas pupias tuas luminosas:

cussas sun. proas de manos gallosas.

26. Seu

L’isco chi pones sas manos in motu

e dadu as a dognunu sa provista.

Ma in custu momentu calmu t’ista

ca non chelzo chi fatas abbolotu:

mi’ chi si cheres fagher s’autista

ti controllan sos ojos primu ‘e totu.

E si sa vista tenes iscadente

no ti dana nemmancu sa patente.

27. Màsala

Goi o gai mi la ses girende,

interessantes sunt sos ojos sanos.

Si sunu interessantes non sun vanos,

los as-abbeltos bene abbaidende.

Deo so tota vida guidende

in sas istradas a volante in manos

chi mi dispedo dae sos poetas

a da chi lasso sas manos chietas.

28. Seu

Ses autista de professione

però a su chi faghes tene cura,

ja chi tratas sas manos a mesura

e das a dogni cosa atentzione.

Ma si ses guidende sa vitura

deves istare atentu in s’istradone.

prite si pones s’oju in abbolotu

ti podes iscollare tue etotu.

29. Màsala

Però fin’a-i como non so rutu

e non mi so iscutu a sas piantas.

Ma unu colpu de verga at iscutu

Mosè, est una de sas proas santas:

gai totu sas undas si sun frantas

e passat in su mare a pe’ asciutu.

E iscomito miràculos gai

chi cun sos ojos no nd’as fatu mai.

30. Seu

Tue-in su mare tou sighi e toca

ch’a mie no m’impoltat pro niente

ca fatu grascias che-i sa fioca

a da chi s’oju lu jito lughente:

deo cun-d-un’ojada solamente

mi apo innamoradu una picioca.

E-d- est s’amiga mia sempre cudda

e de sa manu no m’importat nudda.

31. Màsala

Ma cuddu est miràculu sovranu

ca b’est s’aggiudu de su paradisu.

Est totu capitadu a s’improvisu

e sunu sos prodigios in sa manu

torrende da terrinu egitzianu

cand’in duos su mare l’at divisu.

Ca ch’at in coro sa terra promissa,

colpat sa verga e che torrat a issa.

32. Seu

Nara prit’est chi Pedru cunvertidu,

su chi fit unu grande piscadore:

a da chi a Gesu Cristu issu l’at bidu

ja s’est fatu s’apóstulu mazore

e s’oju at su meràculu cumpridu

ch’at fatu grascias de ogni colore

pruite tantos coros at atratu

ma sun grascias sa manu chi no at fatu.

33. Màsala

Cussas mi paren notìzias betzas.

Pedru fit unu de sos piscadores:

a fadigare sas manos avetzas

pischende pisches mannos e minores

cando cun remos e cando cun retzas:

b’aiat barcas. no b’aiat vapores.

E a da poi cun sas manos ch’impreat

lassat sa retzas e sa rughe leat.

34. Seu

Deo bi torro da chi naras gai

pro ti mustrare su sou valore.

Cristofit pros’ojada unu babbai

ch’est giamadu su Cristos redentore.

Amméntadì chi Pedru piscadore

a Cristos no l’aiat bidu mai.

Apóstulu diventat non piusu

a pena at bidu s’ojada ‘e Gesusu.

35. Màsala

Seu, pro cussu cun megus no brigas,

ti lu juro comente unu frade.

Però in cussas épocas antigas

sos piscadore fin in povertade

in mesu su suore e sas fadigas

intro su mare ‘e su Tiberiàde:

cun manos trabagliende a bonu coro

pro nd’’atire su pische a dom’insoro.

36. Seu

A bi cres chi mi paret fina istranu

mancari sa proposta no ignoro.

In tempus nostru che tempus lontanu

cuddos chi tanta pisca an tentu in coro.

amméntadì chi cun sa barca issoro

chi ‘‘essin chito-chito su manzanu.

Ma nara tue, it’est chi an a detzìdere

a da chi ch’’essin chito e sentza ‘ìdere.

37. Màsala

Est bellu puru a bider una via

e-i su sole de isplendore atzesu.

Ma cando b’at ostàculos in mesu

cussos si deven superare ebbia:

che cando si sullevat unu pesu

bi cheret de sas manos s’energia.

Pro gai in altu jugher che lu chelzas

no est nudda chi ojos no nd’abbelzas.

38. Seu

Ma eo torro a su passadu insara

e repito chi s’oju est prima marca

ca finamenta in sa tempesta carca

ja ìstana chilchende lughe jara.

Sos piscadores a s’insoro barca

aggiunghen finamenta una lampara.

E duncas s’oju est tando chi si ‘antat

prite sa vista est chi su pische incantat.

39. Màsala

Tando torramos a tempus de prima,

ma pro Sisìfu est una cundanna.

Ammentadinde ch’una roca manna

troulat no arrivat mai frima:

pigare che la devet a sa chima,

nde torrat poi de domo a sa janna.

Incue s’oju sou no est propìtziu

ch’est totu manuale sacrifìtziu.

40. Seu

Mi’ chi sa luminosa lampadina

la deves calculare una grandesa

ca ti dat issa sa lughe ladina

afrontare pro poder ogni impresa:

si tue b’andas a Roma latina

b’andas pro ti mirare ogni bellesa.

Però si s’oju non giughes lughente

andas a Roma e no bides niente.

41. Màsala

Ma nara ‘e chie sunu sos tesoros

de sas eras passadas e novellas

cun totugantas sas òperas bellas

e sas òperas, Seu, sun mezoros:

una mirìade de capolavoros

chi lompen dae terra a sas istellas.

Dognunu l’at sa manu fatu esatu

e tue nara cun s’oju ite as fatu.

42. Seu

No mi nd’ofendo cando mi maltratas

ma ti rispondo sàbiu e giocundu.

Non ti nego su méritu profundu

ne-i sas manos si ‘ene las tratas

ma, pensa, sas bellesas de su mundu

non sun sos tzegos chi las ana fatas.

Sas manos tribagliadu an note e die

ma sos li lughian sos ojos che a mie.

43. Màsala

No nde perdas de tempus e faeddos,

ca pro te no at esser un’afare

cando sun totu mios sos aneddos

ch’in sos didos si deven infilare,

e poninde sas perdas subra pare

ana fatu altares e casteddos.

Ammenta chi dogn’òpera est sa mia

e tue l’as pro la ‘ider-ebbia.

44. Seu

In primu chi fatemus sos cuncruos

ti canto unu cuncetu si l’ammiras.

A da chi mancan sos ojos suspiras

prite sufris sos males pius cruos.

Est unu fizu ‘e Remundu Piras,

ch’at peldìdu sos ojos ambos duos.

Dae sa vista at példidu sa dote,

com’istat pianghende die e note.

45. Màsala

Non bidet aurora e ne tramontu

si comente sa vista l’at peldìda.

Ma cun sas manos devet esser prontu

in totu sos momentos de sa vida,

ca sa carena cheret tenta contu

pruite cheret pulida e bestida.

Dae cando sa vida amos connotu

sun sas manos chi arrivan a totu.

46. Seu

Deo l’apo tzitadu pro dovere

chi cando sunu sos ojos in panna

est cussu tale in dispiaghere

prite at connotu sa peus cundanna:

finamenta a bessire da-e sa janna

lu leat a bratzeta sa muzere.

E antzis narat issu prima e poi

ch’est menzus mortu pro no esser goi.

47. Màsala

Ma si apo sas manos no mi avilas,

cun paragones gai no mi ch’esses.

Poi sas farramentas las afilas,

non creo chi cun s’oju bi resesses:

innanti tundes e da poi filas

e da poi chi filas tando tesses.

A boltas fina sena s’oju sanu

si faghet cun sa pràtiga ‘e sa manu.

48. Seu

Iscùltami ‘e nou aizu-aizu

ca ti repito un’àtera cantone.

Tue ja ’essis in protzissione

e usas de sas manos su manìzu

ma si guastu as dogni lampione

nara ‘essire a podes a passìzu?

O aterunu chi at sa vista neta

ti leat, poverinu, a sa bratzeta?.

49. Màsala

Si sighis gai cun megus la gherras,

jà ti n’apago deo su disizu.

Unu santu ch’est bellu che unu lizu

e intro ‘e sa cheja che l’inserras:

però solu no bessit a passìzu

cando tue in manos non l’aferas.

O lu deven sas manos passizare

o est custrintu a bistare in s’altare.

50. Seu

A repiter sa própia cantone

ti faghet, Marieddu, divertire:

su santu ja lu leana a cumone

e sunu cosas chi poto ammitìre

però, Mario, fàghemi a ischire

chie lu jughet in protzissione.

O forsis lu passizan dogni die

cuddos chi sunu tzegos che a tie?

51. Màsala

Non mi ponzas in palcu in muta mala

si no poi, Juanne, m’arrennego.

Sempre sas manos sun sas ch’impiego:

su santu in giru lu ‘ogo a dogn’ala

comente unu truncu chi nde sego

poi lu leo e mi l’’àrrio a pala.

E che lu juto a domo e fato fogu

ca iscaldire si devet su logu.

52. Seu

Deo mancari so mes’antzianu

sempre disizo ‘e s’oju sa lumera

ca mi guidat pianu-pianu

siat manzanu o chi siat a sera

e sentza fagher peruna chimera

pigo in s’iscala a pianu a pianu.

E-d-est chi cun sas manos non fadigo

però cun s’oju est chi bido e chi sigo.

53. Màsala

Mi paret custa tua una lamenta

ca ti ses isfoghende in modu vàriu.

Permiti chi ti leo a manu tenta:

abberimos, Juanne, unu sipàriu

e visitamos un’anticuàriu,

cuntemplare lu deves a s’atenta.

E una mostra cun-d-unu museo:

ti fat’’ider su ch’apo fatu deo.

54. Seu

Sa tua est un’iscena curiosa

però ‘e la finire faghe votu.

Non la dispretzo sa manu gallosa

pruite ogni tribagliu at postu in motu

ma como mi l’as nadu tue etotu

chi cun s’oju cuntrollas dogni cosa.

A cres chi a t’intender mi piaghes

ma deves narrer comente lu faghes.

55. Màsala

S’órdine si rispetat assolutu:

fino si sos chi scultan si cuntentan.

Per’an a esser totus chi si ammentan

chi duas pedras a pare an iscutu

e-i sas manos su fogu alimentan

prite su primu fogu si est allutu:

ch’est unu ‘e sos menzus elementos

ma sun totu ‘e sas manos sos apentos.

56. Seu

S’amos finidu li ‘ogo ‘e manu

ca canto custa sola e m’isto mudu.

Amigos caros, che so antzianu

però tenzo in sos ojos su saludu:

a pena mi nde peso su manzanu

mi leggio su giornale a oju nudu

ca male in ojos no apo connotu

e che a mie gai sian totu.

Cantadores a poesia – Masala e Seu a Seui nel 1996 – Esordiu.

ztaramonte — Sat, 01 Nov 2008 19:11:34 +0000

L’ultima volta che ci siamo occupati di gare poetiche, l’abbiamo fatto il 12 agosto del 2008 pubblicando il secondo tema di un’altra bella competizione poetica sempre tra i poeti Mario Masala e il nostro compianto paesano Juanne Seu, a Cagliari nell’aprile 1979.

In questa edizione vi proponiamo una gara registrata a Seui il 4 agosto 1996 con gli stessi protagonisti. Lo faremo con lo stesso metodo adottato nei precendenti articoli sulla poesia estemporanea, cioè pubblicando la trascrizione prima dell’”Esordio” e più avanti con i temi di rito assegnati dal comitato della festa in onore de Santu Pitanu, il primo “Manu e oju”, il secondo a “Muzere fea e onesta, muzere bella e disonesta” e stavolta anche un finale di “Duinas e battorinas”.

Non mancherà la possibilità di riascoltare la registrazione della gara e, per chi volesse, la possibilità di calarsi in una serata estiva all’ascolto di una gara poetica che purtroppo oggi dopo la scomparsa dei poeti più grandi, l’ultimo Pepe Sozu nel marzo di quest’anno, va scemando. Penso anche perchè noi adulti non siamo e non siamo stati in grado di far apprezzare alle generazioni più recenti il valore culturale della poesia estemporanea e delle gare poetiche. D’altronde anche la lingua sarda che prima veniva parlata in casa come l’acqua bevuta da un bicchiere, ora è solo parlata male e in modo storpiato dai nostri figli. Ricordo, anche se abbastanza giovane, che io non parlavo una sola parola di italiano, pur comprendendolo, fino ai quattro anni d’età. Non è possibile quindi, pretendere che i giovani apprezzino la poesia sarda; per molti versi non capiscono la lingua e il significato.

Buon ascolto e buona lettura.

Carlo Moretti

MARIEDDU MÀSALA / JUANNE SEU

Festa de Santu Pitanu

Seui, su 4 de Austu de su 1996

ESÒRDIU

1. Màsala

Inoghe àteras boltas in passadu

nos amos dresta e dresta a pare istrintu,

sos veros amigos cun modu distintu,

ma poi ca no che so pius torradu

ch’in s’ismentigadolzu abbandonadu

m’aizis bois mi fia eo cunvintu.

Ma menzus isbagliadu chi mi sia

e bos rinnovo un’istrinta ‘e manu mia.

2. Seu

Senza cantare cantos annos fia

in custa ‘idda mancu mi nd’ammento,

ca in su lìbberu ‘e sa mente mia

totu cantas sas datas no assento.

De ch’esser torrad’oe mi cuntento

cun-d-unu campione in cumpagnia

po bos repiter cun sintzeridade

unu saludu a s’antzianidade.

3. Màsala

Silanos e Seui, duas dimoras

chi sun tra issas bastante lontanas,

mancari ambas sardas isolanas

sena ch’’essire da su mare foras,

ma cun istradas istrintas e metzanas

a ch’arrivire be-i cheret oras.

Po gai cantu in viaggiu si patit

si godit cando a inoghe s’imbatit.

4. Seu

Cara Seui, istada ses gentile

de mi fagher s’invitu a custa gara.

Tzertu no poto fagher cosa rara

ca no so in edade giovanile,

ma no ch’at lughe in custu cortile

e no bos poto ’ider mancu in cara,

ma mancari siemus a s’iscuru

suta gara e nos trabassat puru.

5. Màsala

Bellu est sa zente in cara a la sorrìere

però pro cussu no b’at de ti ofèndere,

tantu no ses bennìdu pro ti bìere

ca ses bennìdu a ti fagher intèndere

cando t’intenden già t’an a cumprèndere

e si cantas no tenes de iscrìere.

No b’at bisonzu pro s’improvisada

subra su palcu si lughe no b’ada.

6. Seu

Deo sigo a cantare sorridente

pro chi sia antzianu e so derrutu.

Como non so che primu limbi-acutu

e mesu annebbiada s’est sa mente.

Per’a no bider in facia sa zente

custu cortile mi paret in lutu

e ti torro a repiter puntuale

ch’a mie paret unu funerale.

7. Màsala

Ma calchi cosa dae mente si ‘oghet

ca b’est sa volontade e-i su briu.

Como chi semus in pienu istiu

ja bastat, Seu, su caldu chi noghet

ca ’essit sole e-i s’ou coghet

e de suore si versat unu riu.

Menzus chi si risparmiet energia

ca faghet palte de s’economia.

8. Seu

Deo che so vivende in sa bassura

chi su fogu a de die-dat s’assaltu

ma inoghe ca semus trop’in altu

che so pro mi leare sa friscura.

Ma abbisu s’impiantu si est gualtu

ch’in su cortile non ch’est sa lugura.

Sos chi sunu presentes medas sunu

m’a mie paret no che nd’at mancunu.

9. Màsala

Seui ‘e custos montes est sa dea

proite collocada est-in s’altura.

Como chi ses inoghe ti recrea

e podes rispirare aria pura:

non benzas a ti leare sa friscura

e solu po iscaldire sa cadrea

ca in Seui, si no, non si disvagan

e si non faghes su cantu non ti pagan.

10. Seu

Eo m’ispanto ‘e sa lughe oscurosa

ca no la ‘ido sa zente de fronte.

Ja l’isco ch’est in altu s’orizonte

e curret puru un’ària famosa:

ischis, Màriu, eo fat’una cosa

e che leo a Seui a Tzaramonte,

ue b’at lughes de continu motu

e gai in facia nos bidimus totu.

11. Màsala

No piangas s’in cara non ti mirat

istanote su populu festante,

antzis sa gara no si che la girat

bastu chi fetas su tantu bastante.

Però s’iscuru est pius riposante

e-a improvisare nos ispirat

e-d-est menzus de lughe a no che nd’àere

pruite a boltas ti podes distràere.

12. Seu

A essere a s’iscuru dat istragu

ch’a mie paret ch’est fina indetzente.

Ma so ennìdu a lis dare ‘isvagu

pro chi sia antzianu e decadente.

Marieddu, si como fato pagu,

mi peldonat dognunu sorridente

ca so acantu a dare sos adios

ca passados che sun sos annos mios.

13. Màsala

Ma sa piata est bastante piena

de betzos, de giovànos e piseddos.

Sos Farinas, Testonis e Cubeddos

chi la tenian bundante sa vena

cantaian a lughe de isteddos

e de luna o cun calchi centilena.

Fit a su tempus su palcu a s’iscuru

comente istanote e pius puru.

14. Seu

Deo so chimbant-annos e piusu

e fin’a los contare sunu mannos.

Ma s’edade unid’a sos afannos

m’ana postu ja mesu fora d’usu:

como ja s’intelletu apo confusu

cun sa ‘oghe chi faghet fina dannos.

E si sa ‘oghe e mente no intonat

penso chi custa zente mi peldonat.

15. Màsala

A peldonare at esser-opoltunu

ma cumissu no s’at mancu reatu.

De bonu sensu sos saldos ja sunu

e nos iscultan dae fatu in fatu

ca eo puru da su chimbant’unu

so gira-gira che-i su sedatu.

Ma no mi ch’’esso da sos palcos fora

prite b’at giros de fagher ancora.

16. Seu

Si giras che sedatu o che chiliru

ca Marieddu, ses poeta intreu,

ma ‘eo puru apo dadu recreu

ca in s’ìsola nostra so in giru.

Ma devo narrer chi a su tempus meu

mi paret ora ‘e bater su retiru

e de l’abbandonare cust’impresa

pro mi godìre in paghe sa ‘etzesa.

17. Màsala

Cand’a fiancu meu ti collocas

in su palcu, Juanne, ti recreas,

ca no nde deves imbolare sas rocas:

inue sunu ja las lassas reas.

E no las segas, làssalas intreas,

dae mannas no las torras a picocas.

Tantu bastat sa bona volontade

finas cando b’at pag-abbilidade.

18. Seu

Sa volontade a s’edade mia

creo chi siat fina prosperosa.

Però no b’est sa pia fantasia

de fronte a una folla numerosa.

Ma si fia toradu su chi fia

ja la podia narrer calchi cosa:

como juto su cùcuru incanidu

e sas provistas mias an finidu.

19. Màsala

Ube s’agatat dognunu s’imbarat:

torrare in segus ispera no b’ada.

Muzere mia, sa malefadada,

a da chi so in domo no bi parat.

Deo no dromo e issa est ischidada:

“Tue ses unu dimóniu”, mi narat,

ca in su letu so sempre nervosu

e su palcu mi servit de riposu.

20. Seu

L’isco: muzere tua, sa mischina,

no podet reposare, cudd’iscura.

Deo tenzo in orija sa muina

e-d-est sempre una mùsica segura:

a torrare su ‘etzu in gioventura

non s’agatat peruna meighina.

Acuso in dogni logu sos dolores

ma no mi faghen nudda sos dutores.

21. Màsala

No est a imbetzare una dilgrascia

cun paga foltza e cun sos pilos canos.

Per’a pius de otanta ‘eranos

s’unica meighina est sa cascia

e-i su postu in sa terra bascia

cand’unu in bator lu lean in manos:

unu pagu ‘e crisantemos e de chera

ma non potat sucèdere istasera.

22. Seu

Deo so sanu, gràtzias a Deu,

e mancu s’intelletu est a s’iscuru.

Sento solu ‘e sos annos calchi neu

ca est cussu su male pius duru:

a da ch’arrivis a su tempus meu

creo chi ti lamentes tue puru.

E repitis sa propria cantone:

“Juanne Seu teniat rejone”.

23. Màsala

Unu poeta sa zente l’istimat

ca finas issa si cantat s’ispassat.

Si s’ispassat delusa non la lassat

si sustanzia b’at a da chi rimat.

E-i su tempus ja ‘enit e passat

chi mancu sos dimónios lu frimat.

Gai, Juanne, su tempus afrontes

ma menzus chi sos annos no los contes.

24. Seu

Sa vida nostra at un-itineràriu

ma ‘enit cando est s’ora a finimentu.

Deo puru a sa morte so contràriu

e chelzo chi no benzat su momentu

però deo a tie, caru Màriu,

t’augùro chi cantes fin’a chentu.

E deo a intender su tou cantu

ja mi ndi ‘enzo dae campusantu.

25. Màsala

Cun sa nostra poética favella

cantamos in su palcu a s’improvisu.

Ancora no nos mancat su sorrisu,

dae mesu sa morte che cancella.

E si morimos at a esser bella

chi tocat de cantare in paradisu:

siat a note o siat a die

finit inoghe e comintzat inie.

26. Seu

Ma sos improvisados isolanos

Mario, sun andende terra-terra.

Sos gióvanos an postu in cuntierra

e semus pane pro sos antzianos:

como nde ‘atin sos americanos

e cantantes de Frantza e Inghilterra.

Totu sos ch’andan onore a lis rèndere

tzocan sas manos chentza los cumprèndere.

27. Màsala

Cussa puru ‘essida ti est pretzisa

chi che nd’’enit da terra furistera.

Però a Deu non li naro: mi avisa

si sa molte si ‘etat dae s’aera,

antzis prego chi ‘enzat improvisa

che-i sos versos chi canto ogni sera

chi s’ùnicu disturbu ‘e sa famiglia

est a leare s’ùltima mobbiglia.

28. Seu

Ajò, sa morte isméntigala abberu

Ca, Marieddu, in impicios ti pones.

ma eo torro a-i cuddas cantones

ch’in s’arrejonamentu so sintzeru:

a unu cantadore istranieru

l’ana dadu dughentos milliones

e-a nois sos sardos nos traighen:

sos soddos chi nos dana malaighen.

29. Màsala

Sos miliones cun sos miliardos

non sun ranos ch’ispinghen sas formigas.

Inoghe semus in mesu ‘e sardos:

pro una festa bi cheret fadigas,

ma custos a s’ìsula riguardos

usan, apretzan sas cosas antigas.

E penso chi no s’agatet menzus proa

che fagher a unu santu cheja noa.

30. Seu

L’isco ch’est bellu dogn’usu isolanu

e cheret atzetadu cun bravura.

Ma est passadu su tempus lontanu

proite est cambiende ogni coltura.

Però finas sa sarda gioventura

como faeddat in italianu

proite ateras limbas an-in coro

e ismentigadu si an sa limba insoro.

31. Màsala

S’esórdiu ch’’ogamus dae manu

forsis est ora chi siat suspesu.

Ma malas issonadas ap-intesu

e deo so de orijas fina sanu:

su ‘inari ch’aian l’an-ispesu

pro li fagher sa domo a Bustianu.

Zente chi pro su santu li at credéntzia

e nois tocat de tenner passéntzia.

32. Seu

Finit sa prima parte, fea o bella,

però la terminamus a s’antiga.

Sa gioventura ‘e Seui novella

ja est de collocare in prima riga

prite an’ispesu tempus e fadiga

pro fagher a Bucianu una capella.

Sos giovanotos pro su chi an detzisu

chi los cumpenset in su paradisu.

Cantadores a poesia (III)

ztaramonte — Tue, 12 Aug 2008 10:22:57 +0000

Concluse le vacanze estive (almeno per il sottoscritto, purtroppo), pubblichiamo il secondo tema della gara disputata a Cagliari il 7 aprile del 1979 tra il nostro poeta locale Juanne Seu (Chiaramonti 1915 – 1998) e il poeta Mario Masala (Silanos 1935), dedicato a “Sardigna indipendente, Sardigna italiana”.

Devo dire che il clima estivo calza a pennello con l’ascolto di questi brani. Sentendo la registrazione ad occhi chiusi, si possono percepire il profumo del torrone e dei chioschi dove la birra o il vino scorre a fiumi, un bel tuffo in una festa estiva come si usa tradizionalmente nei nostri paesi.

Continuando con qualche breve cenno storico, possiamo affermare che agli inizi del 1900 fu introdotta, alla fine delle gare poetiche, l’esecuzione della “moda”, un componimento poetico composto in più intrecci nelle parole, cantato in occasione della circostanza per la quale la manifestazione veniva svolta.

In seguito si aggiunse un prologo alle gare, che fu chiamato “Esordio” che permetteva agli improvvisatori massima libertà di espressione non vincolata a nessun tema. Durante il periodo del fascismo, proprio per il carattere culturale, la gare furono proibite o controllate nei temi assegnati ai poeti.

Sino alla fine degli anni sessanta, la presenza della “poesia improvvisata” all’interno delle feste o delle sagre è stata talmente forte, che i giorni dedicati a tale arte erano almeno due o addirittura tre, all’interno del programma dei festeggiamenti.

Anche stavolta leggerete e potrete sentire, come “nell’Esordio”, e nel primo tema “Sa peraula, S’iscrittura”, tutto il brano seguente.

Oltre i versi, troverete circa ogni dieci ottave, un lettore mp3 che vi consentirà di sentire la registrazione della gara. La necessità di dividere la registrazione in sei parti, è unicamente una mia scelta, dovuta al fatto che con spezzoni di files più piccoli, sono agevolati all’ascolto anche gli utenti con linea non ADSL. vi consiglio di avviare il lettore prima di iniziare la lettura dei versi.

Buon ascolto e buona lettura.

Carlo Moretti

SIGUNDU TEMA: SARDIGNA INDIPENDENTE – SARDIGNA ITALIANA

1. Màsala

Su primu tema l’aimis conclusu,

fit finas una palte curiosa

ma ancora semus de su palcu in susu

che in s’altare s’isposu e s’isposa.

Non penso a sa peràula piusu:

como si tratat de àtera cosa

ch’est de sa prima meda diferente

ca tenzo sa Saldigna indipendente.

2. Seu

In poesia sa prima faina

creo ch’at fatu fine fintzas digna

però ca semus suta disciplina

àteru tema ch’amus in cunsigna.

A mie mi est tocada sa Sardigna

amministrada da Roma latina

e naro chi sa terra saldignola

no diat poder viver a sa sola.

3. Màsala

Mi paret un’ispétzia ‘e lota

pro chi no sia de soldadu ‘estidu.

Ma deo in Saldigna so naschidu:

m’iscaglio che fieru patriota

indipendente pro chi siat tota

ca custu podet contare su nidu.

E dia cherrer, sende ìsola amena,

chi no la cumanderat zente anzena.

4. Seu

Si mi permitit s’estru e-i sa musa

lu canto custu tema a bona gana

ca fintzas da un’época lontana

l’ana sempre lassada a sa refusa.

Ma si podet bantare s’Ichnusa

comente prima fiza italiana

e s’at acuistadu onore e fama

suende da sas titas de sa mama.

5. Màsala

Ma ischis ite narrer ti cheria:

si tue as a Roma pensa a issa,

sos ojos mancu e drestu in issa fissa

e lass’istare sa Saldigna mia

ca at trint’annos de autonomia,

como no contat pius sutamissa.

E inube ch’at chelcos e nuraghes

a da chi ses in Roma ite che faghes?

6. Seu

Si mi provocas a bistare mudu

est bisognu chi fata su contràriu.

Però dae su tempus millenàriu

sa Sardigna bisonzu at de aggiudu

ca da chi dat unu francu a s’eràriu

dae Roma ja retzit un’iscudu.

O solu a incasciare ti piaghet?

Si la lassamus sola itest chi faghet?

7. Màsala

A ite abbeltu l’as cussu sipàriu

de fronte a unu pópulu ‘e signores?

Cheres arrejonare umpare a Màriu,

si semus duos improvisadores:

como bastat cun sos cun isfrutadores,

no est pius romanu unu granàriu.

S’at una giunta e unu presidente

cheret narrer chi est indipendente.

8. Seu

De criticare non tenia gana

ma a mi provocare cunsideras.

In Sardigna ch’aiat minieras

e dae tempus serradas las ana

però in Poltuturre e in Othana

fuman ancora sas ciminieras.

E-d-est sa proa ‘e sos continentales

ch’an batidu a Sardigna capitales.

9. Màsala

S’otada tua paret unu lizu,

no podes fagher versos pius bellos.

S’as s’Urbe dea ‘e sos duos gemellos,

no l’as dadu a Saldigna su batizu.

Si nd’ogas sas indùstrias a pizu

sunu mesu serrados sos cancellos.

Tzitende a Poltuturres e Othana

fina de rier mi nd’’atis sa gana.

10. Seu

Cando ‘e mi criticare ses in brama

faeddamus che improvisadores.

Tue b’as impignadu sos suores

ma eo ti apo aggiuntu pius fama,

prite t’apo ‘estidu de signores

totu cuddos chi fini fatu ‘e s’ama.

E si distinghen in dogni paese

ma como ismentigada ti nde sese.

11. Màsala

Làssami istare s’ama e-i s’alzola,

si pones mente che passas atesu

ca sena b’aer romanos in mesu

sa Saldigna istare podet sola.

Como sa limba nostra, si as intesu,

cherimos insignare in dogni iscola:

indipendentes, veros isolanos

pruite sun disturbu sos romanos.

12. Seu

A da chi faghes de cussos azardos,

Sardigna cara, in impicios ti pones.

Mi’ chi ‘e Roma sun sos campiones

ch’a Sardigna mandadu an milliardos.

No m’as a narrer proite sos sardos

sun in giru in diversas natziones.

E duncas no ti ‘antes ne ti lodes

ca a sa sola campare non ti podes.

13. Màsala

Cando ch’’essis, Giuanne, sempre a toltu

male ti sun andende sos pianos

ca nois no cherimos sos romanos

e bell’e gai no bos ana moltu.

Pro s’iscàndalu ‘e sos aeroplanos

unu nd’an cundennadu e unu assoltu.

E bos azis divisu miliardos

ma sena b’esser in mesu sos sardos.

14. Seu

Como sentza t’ofender m’as ofesu

cun sa limba a folchidda che colora.

In Roma sos diritos an difesu,

cussos che sun in oscura dimora.

Ma, Sardigna, no as cumpresu ancora

chi sos romanos ti jughen a pesu

e ti difenden si male ti agatas

e tue pro cumpensu la maltratas.

15. Màsala

A bisu meu no ses persuasu

chi como sun sos tempos cambiados

e bastat cun su trigu e cun su casu

e cun cuddos anzones ingrassados.

In-d-unu tempus nos azis invasu

però como nos semus libberados:

istade fora, o zente maligna,

e Fortza Paris namos in Sardigna.

16. Seu

Amiga a sa Sardigna sa matana,

no ti fetes pro issa limbi-acutu.

Fintzas cando ‘e pane ses in gana

tue retzis da Roma calchi frutu.

O as ismentigadu chi ch’as jutu

tzeltos sardos bandidos in Toscana?

Solu pro unu punzu ‘e sarda zente

disonoras s’interu continente.

17. Màsala

Ajò, caru romanu, no confundas

e no comintzes a fagher su macu.

Inoghe ch’amos sas terras fecundas,

no nos podet mancare pane in sacu.

S’ìsula est sa camedda e no su tacu

de s’istivale divisa in sas undas.

Si che ses tue a-i cudd’ala ‘e mare

deo no ti permito ‘e che passare.

18. Seu

Si no as bidu mai primavera

ses istadu unu cane ventureri.

De su chi t’apo fatu ti nde sera

ca as cambiadu finas mestieri.

Arrivit in Sardigna un’ingegneri

e che lu cheres ponner in galera:

ca sa sardigna est ruza e no cumprendet

e tratat male a chie la difendet.

19. Màsala

Sa Saldigna est isula minore

però che tenet cunzados e tancas,

cun belveghes nieddas e biancas

no che mancat pastura e ne laore.

Ma tue as unu vicediretore

ch’est s’iscàndalu de totu sas bancas.

Nde l’an bogadu ca l’aian presu

ma l’an da su servìtziu suspesu.

20. Seu

Permiti una risposta rie-rie

como ti torro ca no as rejone.

Cussu fit de sa banca campione

e at fatu ‘e galera calchi die,

però si postu che l’an in presone

ja l’at fatu pro fagher bene a tie.

E como lênde a malu ti lu ses

ma li devias lingher ambos pes.

21. Màsala

Ohi, cantu mi pares sorridente

ca t’ido sempre de alta morale.

Ma comintzamos da su minerale

ch’est sa Saldigna nostra possidente.

Sa richesa no est continentale

ma che la lean a su continente:

si pensas cussas vias de abbèrrere

in Saldigna no ti che dia chèrrere.

22. Seu

Cando m’as fentomadu un’individu

mi nde so agatadu finas male.

Cussu dae galera nd’est bessidu,

su chi manizaiat capitale,

però sos milliardos an finidu

in su Creditu Sardu Industriale.

E t’at aer mandadu calchi soddu,

fis istadu cun sa bértula a coddu.

23. Màsala

Tue pensa a su guvernu centrale

ca no giughes sa limba a nodu mortu.

Si faeddas de un’industriale

a sa Saldigna l’at fatu unu toltu

e cussu, Seu, fit continentale:

retiradu li ch’an su passapoltu.

Fetende finta sun chi nos aggiuen

e chi nos cheren bene e nos distruen.

24. Seu

Chilchende a t’arrangiare che poete

mi naras chi ti ses arruinadu.

Prima su paragone chi ti fete

ma no nelzas in Roma chi an furadu

ca como an pro Othana istantziadu

nachi de milliardos trintasete.

Si taldat su ‘inari a t’arrivire

comente primu torras a pedire.

25. Màsala

Sos de Othana sun trabagliadores

pruite campan da sa zoronada.

Prima fini massajos e pastores

però mi paret chi l’an’isbagliada:

poninde bundu ‘e Roma a sos signores

leadu an de s’indùstria s’istrada.

Como fina in piena primavera

iscuden cascu ch’istampat s’aera.

26. Seu

Deo nudda ti rendo pro niente

e mi nde poto dare cussu ‘antu.

Tue invece m’as nadu in sardu cantu

chi cheres sa Sardigna indipendente.

Nara pruite su sardu presidente

a pedire bi ‘enit dogni tantu

fatende fintzas sa ‘oghe pesante

chi paret unu tzegu mendicante.

27. Màsala

Esageradu, Juanne, non sias

ca faghes un’errore madornale.

Sos saldos a s’eterna capitale

bandian a pedire àteras bias

però poi s’est bàtidu Corrias,

pro s’autonomia regionale.

E finas ch’est arrivadu a igue

e-i como a pedire ch’enis tue.

28. Seu

Amméntadì chi sa sarda regione

ja fit primu ‘e como in penas graves

e si b’aias dadu atentzione

li devias a Roma cantar’aves.

Fatu at campos de aviatzione

e ti at postu ‘e tragheto sas naves.

Per mesu sou podes viaggiare

siat in altu comente in mare.

29. Màsala

O gentile poeta ‘e Logudoro,

mi paret chi no sias aggiornadu

ca si comente t’ana male informadu

e sa Saldigna no che l’as in coro.

Manneroni a sas naves at pensadu

e sa prima intìtulat a Nuoro,

dae sa coa finas a sa prua,

e como naras chi est proa tua.

30. Seu

Sos sardos solu in gherra fin astutos

chentza timer ne morte ne dolores.

Ma fin solu massajos e pastores

chentza ch’aer inoghe àteros frutos:

no costruis ne vituras ne tratores,

ne fabbricas tenides, ne tessutos.

S’a-i cudd’ala ‘e mare no bi jampas

no m’as a narrer comente ti campas.

31. Màsala

Tra su ‘e basciu e-i su montanu

est fértile e istérile terrinu.

Ma de su tema chi t’an postu in manu

lu as ismentigadu su caminu.

Si as a Roma no as a Torinu

a Bologna, Verona e a Milanu.

Si coltivat piùere cun ludu

tue càntadi a Roma e bista mudu.

32. Seu

S’est chi mi pones mente, caru Màriu,

pro ch’apas poesia cun iscola

a nois nos an dadu unu binàriu

e de cumprender tue ti consola.

Tue pretendes sa Sardigna sola

però ti devo fagher su contràriu.

A da chi t’ispiego ogni problema

no mi nelzas chi so fora ‘e tema.

33. Màsala

Mi dispiaghet si mi richiamas

pro chi tenza virtudes e difetos.

Ma lassa sas alzolas e sas bamas

cun produos iscarsos e discretos:

pensa chi sun sos nostros sos progetos,

nois realizamos sos programas.

Si semus saldos veros, genuinos

ite che faghen sos trasteverinos?

34. Seu

A faeddare male tue m’induis,

a toltu ses sonende sa campana.

Però ista seguru chi no fuis

dae sa parte chi dadu nos ana

chi ti che juto in terra americana

fintzamenta su casu chi produes.

Si restaiat inoghe su casu

ja dias aer pastore romasu.

35. Màsala

De richesa nde tenes un’empóriu,

b’as fina capitale cun valore.

Ma s’’enis a su nostru territóriu

cheret narrer chi ses isfrutadore

mancari m’epas nadu pedidore

a da chi ando a Montecitóriu.

Cando b’andat Del Rio e cando Soddu

ma no nde ‘ides a béltula a coddu.

36. Seu

Si mi rispondes sempre in bonumore

bae chi cussa parte la discuto.

Ma mi nara che bonu cantadore:

dae custa Sardigna ite che juto?

Si mi naras chi so isfrutadore

mi deves narrer in-d-ite t’isfruto

si dae custa terra desolada

ne mancu it’isfrutare no che nd’ada.

37. Màsala

Cando in su palcu ti nde fichis reu

a mi pones in mente? Atentu ista.

Sos mios onorevoles in lista

candidados los apo, caru Seu.

Ma si fin totu ‘e su parere meu

no t’atzetimis mancu che turista

ca como est dogni saldu incivilidu,

su tempus de sos macos est finidu.

38. Seu

Cando ti ‘oltas a Roma latina,

caru Màrio, débbile t’agato.

Si no possedis mancu una sisina

o forsis no t’abbizas su chi fato?

Cando ch’enzo pro amore a sa marina

est meda su ‘inari chi nde ‘ato.

E da chi mi divelto che turista

est pro ‘atire a tie ogni provista.

39. Màsala

No t’apo a fagher unu cumplimentu

e nemmancu un’elogiu addiritura

ca da su Campidanu a Gennargentu

no mi mancat ne caldu e ne friscura.

Sas tassas già sun sempre in aumentu

e bois sezis in villeggiatura.

………………………………….medas

est mezus chi a Saldigna no ch’enzedas.

40. Seu

Eo no ti ofendo si mi ofendes

ca no isculto sas tuas cantones.

O cando mai saldu, no, cumprendes

chi valorizo fina sos masones.

A da ch’iscannas sos primos anzones

sos anzones in Roma che los bendes:

est mezus ricu ‘e sa romana réndida

che a restare robba sentza ‘éndida.

41. Màsala

O caru Seu, as cummissu un’errore

cando su passu no as misuradu

ca sa Saldigna est unu fiore

in su regnu ‘e Netunu coltivadu.

Si sa paga as aggiuntu su valore

est tue chi la sa legge as emanadu.

Cara s’as tentu a s’ìsula bianca

chelz’eo sa Saldigna zona franca.

42. Seu

Cantu ti naro cumpresu ja l’as

ca ti faeddo in saldu che cantante.

Antzis ispero chi mezores cras

ma como tenes dépidu pesante

ca si richesa tenes abbundante

ma no naras a Roma ite li das.

Ch’as in Saldigna finas late ‘e pudda

però a Roma no as dadu nudda.

43. Màsala

Caru Seu, no bistes tichi-taca

ca m’ana nadu: su tema abbandona.

Ma Roma tua si cheret padrona

cust’ìsula pro tenner a teraca.

. . . . . . sa palte pius bona

che pones sempre in sa tua busciaca.

Tue ti godis de sos primos frutos

e a nois nos das sos rifiutos.

44. Seu

S’an ordinadu a serrare sa janna

apo finidu e canto custa ebbia.

Isco ch’est sa Sardigna in carestia

ca l’est tocada una peus cundanna,

però devo pregare in poesia

chi Roma tenzat una cascia manna

ca si bi at dinaris a igue

nde podes profitare finas tue.

Cantadores a poesia (II)

ztaramonte — Sat, 12 Jul 2008 09:44:55 +0000

Continuiamo in questo spazio a raccontare con brevi cenni, la storia dei poeti improvvisatori e continuo a scusarmi con i lettori, per gli errori che si potranno incontrare durante la lettura di questi versi.

Il canto dei poeti improvvisatori era sempre accompagnato da un gruppo di cantori che formavano il coro d’accompagnamento, attraverso suoni vocali armonizzati e gutturali. Nel nord Sardegna, il canto dei poeti si è sempre differenziato da quello del sud per via dell’abbinamento in quest’ultima zona con strumenti musicali (chitarra o fisarmonica). L’intuizione del Cubeddu, che riuscì a trasportare quest’arte, da semplice momento di svago a momenti collettivi importanti come le feste in piazza, fu grande.

Da quel momento, col passare degli anni, le gare poetiche sostituirono ogni tipo di manifestazione, divenendo punto di riferimento e base organizzativa per tutte le feste e sagre paesane.

Anche stavolta leggerete e potrete sentire, come nell’articolo precedente, il primo tema della gara disputata a Cagliari il 7 aprile del 1979 tra il nostro poeta locale Juanne Seu (Chiaramonti 1915 – 1998) e il poeta Mario Masala (Silanos 1935), dedicato a Sa peràula, s’iscritura” ; nel prossimo articolo concluderemo la gara con il secondo tema “Sardigna indipendente, Sardigna italiana”.

Buon ascolto e buona lettura.

Carlo Moretti

PRIMU TEMA: SA PERÀULA – S’ISCRITURA

1. Màsala

. . . . . . . . . . . . . .

nachi fit s’istrumentu difetosu

e iscusade pro sa longa atesa.

Però sighinde in su palcu s’impresa

ecco su primu tema valorosu

chi presentadu nos an in cust’àula:

a mie mi est tocada sa peràula.

2. Seu

Terminados in totu sos atritos

mi paret custu pópulu calmadu.

Però chie at sa festa organizadu

paret chi chelfan àteros cunflitos

e a mie in su tema mi est tocadu

a fagher su cumentu a sos iscritos

pruite in custa nostra congiuntura

tocada m’est in tema s’iscritura.

3. Màsala

De bona volontade mi preparo

e creo chi un’errore no commito.

Deo sa pinna a un’ala l’imbaro

si comente est sa limba sa chi impito

e cand’apo sa limba est su chi naro

chi da sa mente mia bos trasmito.

Est una palte bastante distinta

e no bi cheret pabilu e ne tinta.

4. Seu

Subra ‘e custu palcu fatu ‘e tàula

nos an dadu a cantare un’argumentu.

Est beru chi sa limba at un’acentu

e cummentat su ‘eru e-i sa fàula

ma narat unu diciu sa peraula

chi si la podet pijare su ‘entu.

Ma si sa pinna a iscrier si prestat

est testamentu chi eternu restat.

5. Màsala

O Seu, no fetemus sos piseddos

in sos cuncetos e sos paragones

ca si tue as de oro sos aneddos

deo apo de prata sos isprones:

ti deves ammentare sos faeddos

sun de s’ìntimu sas ispressiones

e cando un’iscritu dês prodùere

tando est a consumare e a distrùere.

6. Seu

Deo l’isco chi cun sa limba pura

tue cummentas de fronte a sa zente.

Però est provisória solamente

ch’est ópera chi tenet paga cura:

provisória no est s’iscritura

prite la podes legger frecuente

ca b’at batidu da tempus remotu

totu sas cosas chi no as connotu.

7. Màsala

De iscritore pónedi sa toga

e addura, Juanne, a postu tou.

Ma si cheres in palcu dare prou

as una limba, a faeddos t’isfoga.

A da chi fit su mundu nou-nou,

innotzente sa zente, gioga-joga

arrejonende cun sa limba tota

ca sa pinna no fit mancu connota.

8. Seu

Tratare ‘e s’iscritura sas fadigas

forsis no apo s’intelletu adatu.

Ma a su mancu mi sento soddisfatu

de aer registradu totu in rigas.

Nàrami tue comente est chi as fatu

a las connoscher sas cosas antigas:

est su méritu meu penso e creo

pruite fatu connoscher l’ap’eo.

9. Màsala

Sos versos tuos sun iscuisitos

chi sempre bellos de los fagher tentas.

Si de rimare cantende ti apentas

sun totu in sos faeddos sos profitos

e cando mi faeddas de iscritos

prima los legges, poi los cummentas.

Si cantu esistit mundu in terra duran

cando no los cummentas non figuran.

10. Seu

No la dispretzo sa limba sonora

ch’at totu sos cummentos postu in usu.

Ma s’istória est chi che restat fora,

no ti lu chelzo narrer pro abbusu

ca su chi preigadu at Gesusu

tue cun limba cummentas ancora.

Però li nara a su pópulu unidu

comente cussos fatos as ischidu.

11. Màsala

Caru Juanne, a fiancu mi frima

ca arrejonamus pianu pianu.

Su chi est moltu ‘e su Golgota in chima

no l’ana ’idu cun sa pinna in manu:

Gesucristu no fit un’iscolanu

ca no at fatu nemmancu sa prima.

Nos at redentu e dadu su peldonu

ma solu faeddende saggiu e bonu.

12. Seu

A da ch’in Gesucristu abbarras fissu

che ‘ogamos sos dùbbios e velos.

De preigare at tentu su permissu

sende ‘estidu in sos biancos telos

ma sas preigas chi faghiat issu

an iscritu in sos bator Evangelos

ca est s’iscritu chi at chélfidu gai

e no lu poden trascurare mai.

13. Màsala

Acampende ti ses tantos diritos

unu poeta ch’at isperiéntzia.

Ma Gesù Cristu at tentu s’esisténtzia

pro los salvare sos fizos afflitos:

fin sos faeddos suos beneitos

e dogni frase fit una senténtzia

dae sa gruta fin’a su Sinài

ma ammenta chi no at iscritu mai.

14. Seu

Pro poder cunvertire ogni trassistu

l’imbiat dae chelu su Babbai.

Proadu at preighende ogni guai

e l’ana crocifissu e l’ana pistu.

Ma tue, Marieddu, a Gesucristu

no l’as connotu e no l’as bidu mai:

solu s’ópera legges frecuente

che chi juteras a issu presente.

15. Màsala

Preocupatzione no mi leo

Cando, Juanne, ti nd’addritzas cue.

Immaginamus chi ch’est in sa nue

e deo in Gesucristu ja bi creo:

tue naras chi no l’ap’idu deo,

pro gai no l’as bidu mancu tue.

E no b’at unu chi l’at bidu iscriende

ma medas l’an intesu faeddende.

16. Seu

Est tzeltu chi su santu Redentore

deo l’ap’idu solu in caltolina.

Ma sa sua poténtzia divina

an tzeltos de la ‘ider tentu onore:

a da chi fia pitzinnu minore

leggia calchi cosa in sa dotrina

e pro cussu seguru mi nde sento

ca su ch’apo leggidu mi l’ammento.

17. Màsala

Caru Juanne, sa pinna maniza:

no est unu treutu in s’alzola.

Ma pro iscrier bi cheret iscola:

su faeddu est istintu, ti nde abbiza

ca Pedru cunvertidu nd’at tremiza

si t’ammentas in-d-una preiga sola.

Su chi at fatu faeddende un’ebreu

no lu faghen tremiza che a Seu

18. Seu

A faeddare in sas …………………….

………………. in peraula perfeta.

E pensa chi ‘e sa limba su cummentu

l’iscrien dae s’a fina a sa zeta:

da ti faghen sa legge in parlamentu

la deven pubblicare in Gazeta

pruite si no l’iscrien a tenore

mancu sa legge no tenet valore.

19. Màsala

Ite sun sos faeddos ti nd’ammentes

a boltas bellos chi paren fiores

cand’’essin da s’internu de sas dentes

pro chi no apan formas e colores.

Mi’ chi sos mios sun sos oratores,

cussos poden contare elocuentes

ch’an preigadu e chi sun preighende

e tue nd’as de aju iscriende.

20. Seu

No nego chi sos tuos oratores

apan totu in sa limba sa poténtzia.

Ma pensa chi bi sun sos iscritores

o chi an pius manna inteligéntzia.

De sa radio sos cummentadores

jughen sempre un’iscritu a sa preséntzia

e si s’iscritu no bi lis preparan

no s’ammèntana mancu su chi naran.

21. Màsala

O Sozu*, in dialetu ‘e Logudoro

ja ti l’insigno deo sa dotrina.

Faeddat Salomone in Palestina

e balet dogni frase unu tesoro:

li regalat de Saba sa reina

deghe cammellos gàrrigos de oro.

Fit sapiente e podias cumprèndere

chi bandaian totu pro l’intèndere.

* Inoghe Màsala jamat a Seu cun su sambenadu

de Sozu: est una farta chi podet cumbinare.

22. Seu

E-it’est a cantare una cantone,

siat allegra o siat infelice?

Ma ja l’ischis chi in dogni ocasione

est s’iscritu chi selvit de cornice:

as bidu a dogni attore e dogni attrice

chi lis preparan unu copione.

E-i su copione est chi cummentan:

chentza s’iscritu ‘e niente s’ammentan.

23. Màsala

Sos faeddos a giogu no ti lese

e creo chi lu sigas s’arrejonu

ca Salomone aiat cussu donu

e tue ‘e fronte a issu nudda sese.

Infati s’oro pretziosu e bonu

li ch’an leadu finas a sos pese

e si naras chi fit un’iscrittore

che tue mannu faghes un’errore.

24. Seu

Nachi fit Salomone paladinu

e no ti che lu furo ch‘est su tou.

Ma forsi no at dadu s’altu prou

de esser ne terrenu ne divinu.

Si permitis a su fiancu sou

deo bi ponzo a Dante fiorentinu

e risólvelu tue custu drama

a bider chie tenet pius fama.

25. Màsala

Como mi ch’intras in-d-unu poeta

chi contat sos pius de sos famados:

cun dogni frase sua giara e neta

sos dimónios los at ammajados.

At pùlpitos e tronos innalzados

e-i sa palte ‘e sa limba rispeta

da ube faghen a piangher e rìere

e no b’at mancu bisonzu ‘e iscrìere.

26. Seu

Si no est a iscrier importante

mi paren cosas de leare a risu.

Ma su fiorentinu est su zigante

chi no at faeddadu de improvisu

ma sos iscritos chi at lassadu Dante

che sun pigados fina a paradisu

chi ch’est pius in altu ‘e sa nue:

pruite no provas a bi jomper tue?

27. Màsala

Tue ses mannu e mi pares picocu

cando in mesu ‘e su fogu ti ch’imbolas.

Fit Sant’Antoni un’oratore ‘e tocu,

parian sas peràulas violas:

che passat in sas vias de Marocu

e serran sos ufiscios e iscolas.

No si podiat cun sa pinna aprèndere,

li ponian infatu po l’intèndere.

28. Seu

Antoni Santu su pische marinu

nachi reduit in-d-unu momentu.

Ma s’iscritu bi cheret a puntinu

fintza pro aer unu documentu

ca si còmporas domo cun terrinu

ti deves fagher sempre un’istrumentu

ca si no faghen un’iscritu ‘onu

ses su padronu e no contas padronu.

29. Màsala

Lass’istare sas domos e cuiles,

no bistes sempre cun sa pinna in manos.

Sos atèos an fatu cristianos,

sos chi fin inciviles sun civiles

cuddos ch’an tentu sos chelveddos sanos

connoschinde ‘e sa limba sos istiles.

Sos chi an insignadu e istruidu

cussos an preigadu e cunveltidu.

30. Seu

A-d-ite importat su ch’an preigadu

pro chi s’an cun sa limba fatu corte?

Ma osserva ogni essere criadu

chi d’’enner a sa vida tenet sorte:

est sa die chi naschet registradu

e cancelladu a s’ora ‘e sa morte.

Ma da chi in sos iscritos no bi crêse

tando no s’ischit mancu chie sese.

31. Màsala

Cussos iscritos tuos sun nieddos,

no est late biancu chi si suet.

Ma isculta ‘e Don Bosco sos faeddos:

dogni faeddu unu bene produet

ca a sa via ‘e su bene ti conduet

chentuchimbantamiza giovaneddos.

E cando realizat su ch’isperat

peruna pinna b’at chi lu superat.

32. Seu

Ja l’isco chi sa limba est onorada

ch’ispricat su dolore e-i s’afetu

ma s’iscritura faghet pius tretu

tocare podet a dogni contrada.

Pro narrer tzeltas cosas in segretu

l’iscries in sa litera serrada:

in s’iscritura sos segretos sunu

e no lu podet ischire nisciunu.

33. Màsala

O Seu, ancora vida e briu as

ma pares a sos ùltimos respiros.

A nos ch’intramos in àteros giros

ca no podimos isetare a cras?

Ma si sa limba tua mi la das

deo ti dao milli pinnas biros:

ja ch’a tie ti paret un’afare

nara si ses dispostu a cambiare.

34. Seu

Ba chi ’eo no cambio niente,

tento in su campu meu sa manera.

Mi bastat solu sa pinna presente

in issa b’at isperàntzia e ispera:

deo poto mandare una litera

a s’América o a su continente

e li ponzo ogni cosa registrada

mancari siat sa ‘uca serrada.

35. Màsala

E diàulu e pinnas e tinteris,

a-b-ite a tanta cosa a pitu istas?

Oe no lompet su ch’ispedis deris,

invece ‘e t’allegrare ja t’atristas:

bi sun invece cuddos pacifistas

ambasciadores totu e messaggeris

chi paran a s’ostàculu sa petorra

cun faeddos sintzeros a s’anda e torra.

36. Seu

No est sempre chi tue as faeddadu

o forsi it’est s’iscritu no as cumpresu.

Podes aer finamenta preigadu

ponzende tantas cosas in tramesu

ma as bidu tzeltos capo de istadu

si mandan sos iscritos dae tesu

fintzamenta da s’Africa a inoghe

ca no si poden faeddare a boghe.

37. Màsala

Custos iscritos tuos sun cumpridos

ma nàrali a su pópulu presente

chi b’amos un’illustre presidente

inube sos Istados sun Unidos:

pro sa paghe ‘e su Médiu Oriente

si b’impignat cun faeddos pulidos.

Ogni faeddu ricamadu e téssidu

e finas ch’at s’iscopu b’est reséssidu.

38. Seu

No as risoltu totu a contos fatos

pro ch’apas faeddadu a facia franca.

No los cumbinches sos coros ingratos

si no b’est sempre sa calta bianca

ca da chi si reunin in sa banca

sos guvernos iscrìene sos patos

ca bi restan fatigas e atritos

si no bi sun in banca sos iscritos.

39. Màsala

No b’at bisonzu su pabilu ‘e tìnghere

e làssalos istrintos sos verbales

ca sos faeddos sun issentziales

cando an netzessidade a si distìnghere.

Però a boltas b’at duos rivales,

tue sas manos lis faghes istrìnghere

e sos faeddos los poden cumbìnchere

siat po pelder o siat po ‘ìnchere.

40. Seu

Non pacificas tue sos rivales

cun sa limba si sun in chistione.

Ischis chi da persone tra persone

fàghene sos iscritos puntuales

e fina natzione e natzione

istìpulan sos patos commerciales.

Si sos iscritos no los impiegan

de su ch’an faeddadu si nde negan.

41. Màsala

Non fetas finta d’esser suldu e tzegu

ca cussa palte no ti l’ana dada.

Bellu est a fagher una faeddada,

a lassare sa pinna ‘e s’impiegu.

Sa mente ‘e s’ignorante e de su legu

cussa cheret, Giuanne, illuminada.

Eo no naro chi sa pinna impites

ma si podes sa limba no l’evites.

42. Seu

Da chi rendes meritu a sa pinnina

ca s’iscrier no cheret trascuradu

ca fintza cando paltis a soldadu

ti che jughen cun-d-una caltolina:

da chi finit sa tua disciplina

tenes unu congedo preparadu.

Ma est sempre s’iscritu su chi lughet

chi ti nde ‘atit e chi ti che jughet.

43. Màsala

Como ses faeddende de soldados,

sos chi an sa divisa sunu tristos.

No ti naro chi sian totu Cristos

ca no los an a rughe cundennados

ma sos chi faeddende sun abbistos

sas pius boltas los an rifolmados.

Naran de su dovere chi si abbusan

ma intantu cumpatin e iscusan.

44. Seu

O Mario, su tou faeddare

no lu cunfrontes cun s’ópera mia.

Fintzas cando ti deves cojuare

a da chi t’as chilcadu cumpagnia

cando su “sì” narades in s’altare

deves ponner sa frima in segrestia.

Però si no frimades a dovere

no sezis mancu maridu e muzere.

45. Màsala

Si sa cosa s’ingrandit e s’abbellat,

sempre in sas paltes sun sas frases raras.

Amméntadì chi una abbelta ‘e laras

peruna goma b’at chi la cancellat:

cando sunu de fronte duas caras

incue est su faeddu chi afratellat,

sas frases prontas e chi s’arrejonan:

si cumpatin a pare e si peldonan.

46. Seu

Bisonzu a iscrier chi provedas,

Màriu, si ti cheres assistidu.

In s’Itàlia nostra no as bidu

chi fintzas sos paltidos sunu medas

però sos votos de unu paltidu

si devene contare in sas ischedas.

Si votu in sas ischedas no bi nd’ada

ja contat una préiga isprecada.

47. Màsala

Ma calchi ‘olta sas laras abberis

e pregas pro sas ànimas defuntas.

Tando t’ammentas sas cosas de deris

e t’imbenujas cun sas manos giuntas.

Invece nd’ides de conca lizeris

chi faghen un’istella a chimbe puntas.

Cussos chi l’ana sa pinna impitada

che dian cherrer sa manu segada.

48. Seu

Pónemi mente e-i sa ‘uca tanca

pro no ti narrer chi est sa limba ingrata.

B’at tzeltos chi an sa conca cuadrata

e non lean sa pinna mai in franca

ma si ponen a boghes in piata

chie tirende a dresta e chie a manca.

Ca s’Itàlia l’ana arruinada

nde dian cherrer sa limba segada.

49. Màsala

No ch’intremus in celtas chistiones

ca si no malumore ch’at in terra.

Si sun de paghe sas ispressiones

cue no bi capitat una gherra.

Sa santa fide ch’as in coro aferra

e tando intona sas oratziones.

A s’oltretumba no sias in s’ispera

da che poder mandare una litera.

50. Seu

Sa limba in oras bellas dat recreos

ma sempre calma sa limba la jughe.

Però t’ammenta ch’at postu in anneos

a unu chi cheriat dare lughe

pruite sa limba mala ‘e sos ebreos

at nadu a Cristos a ponner in rughe.

Óperas pro no fagher gai brutas

est mezus chi de limba no nde jutas.

51. Màsala

Si che torras a terras beneitas,

o Juanne, sa limba intervenit.

Cussas de deris sun cosas iscritas

ch’an a durare in su tempus chi ‘enit.

Ma tue cantas su chi ti cumbenit,

su chi no ti piaghet lu evitas

ca sas legges severas e sas santas

sempre cun sos faeddos ti las cantas.

52. Seu

Sa limba in custas oras soddisfaghet

cando jara faeddat e ladina.

Ja isco chi sos coro puru apaghet

e diveltit in calchi serantina

ma da chi leo in manu sa pinnina

ja poto iscrier su chi mi piaghet.

E mai in giaru no si manifestat

pruite est su segretu chi bi restat.

53. Màsala

Non naro chi sa pinna l’abbandones

dadu ch’in tema s’iscritu as in manu.

Ma sos omìnes de primu pianu

si distinghen in sas espressiones.

Como semus in pienu ‘eranu

guasi in clima de votatziones:

sos candidados tra coltos e dotos

cando faeddan acuistan votos.

54. Seu

Da ch’a votare semus obbligados

devimus fagher sos nostros obbligos.

Ma ja as connotu casos capitados,

sian tempos modernos o antigos:

sos chi sunu in sa lista candidados

iscrien a parentes e amigos.

Creo cun sos iscritos los maltedden

e no impoltat chi no los faedden.

55. Màsala

Oh, it’errore mannu su ch’as fatu

vicinu a mie chi so de Silanos.

Si naras sos faeddos chi sun vanos

m’as postu sa cicuta in su piatu:

cun sos faeddos semus a contatu,

cun sos iscritos che semus lontanos.

E lassa dogni riga sena iscrita

e fàgheli a s’amigu una visita.

56. Seu

No importat si lontanu est s’istrada

fintzas dae Casteddu fina a Bosa.

No bastat sa peràula famosa

a domo mia a fagher s’arrivada

ca si mi deves narrer calchi cosa

mi mandas una litera serrada:

ca est in s’iscritura s’impoltàntzia

chi avicinat fintzas sa distànzia.

57. Màsala

Sos versos tuos sunu delicados

e cussas frases méritan intesas.

Però, Seu, b’at àteras sorpresas,

faeddos chi ti sun ismentigados:

una litera càusat ispesas

ca in sa posta b’at impiegados

mentres pro sos faeddos, tene in mente,

chi no ispendes própriu niente.

58. Seu

Narrer chi b’at ispesa est un’errore

ca ja bi cheret pagu capitale

e bi arrivit unu pedidore

a ti poder iscries puntuale.

Ma si ti pones unu difensore

a ti difender in su tribunale

t’at a difender cun faeddos raros

però cussos faeddos costan caros.

59. Màsala

Tue mi pares in chilca ‘e vitória

però ses a su puntu ‘e ti arrèndere

ca chie at una frisca memória

faeddende ja lu podes cumprèndere.

E si tenes bisonzu ‘e ti difèndere

tando chilca unu mastru ‘e s’oratória:

unu legale de primu pianu,

ma chi no siat sempre a pinna in manu.

60. Seu

L’isco ch’un’avocadu cun istile

cun sa limba si ponet in atritos

e-i su malu torrat a umile

pro chi cummissu nd’apat de delitos.

Però in d-una càusa civile

sa càusa si faghet in iscritos

e balet s’iscritura solamente

ca sa limba no balet a niente.

61. Màsala

Ajò e contos mannos no ti fetas

ca como as unu pagu esageradu.

Si s’avenire an profetizadu

cussos faeddos fin de sos profetas,

si an difesu e ana cantadu

lu deves a sa limba ‘e sos poetas.

Chi sa limba no balet a niente

lu podet narrer un’incumpetente.

62. Seu

Si est istada sa trumba valente

pro chie in poesia est un’artista

lu naro a boghe manna a custa zente

e fintza a chie no ch’est a sa vista.

Però si deves fagher s’autista

deves aer iscritu una patente

ca si no ti cuntzedin s’iscritura

no podes guidare una vitura.

63. Màsala

O caru Seu, si mente mi pones

nois su tema faghimos suspesu.

Non naro chi s’iscritu l’abbandones

ma sos faeddos tenen pius pesu:

tra sos capo de duas natziones

b’at sempre un’intèrprete in mesu

e cando est in mesu no si fuet

però est sos faeddos chi traduet.

64. Seu

S’a palte lu lassamos su cummentu

ti l’atzeto comente unu frade.

Ma s’iscritura est unu testamentu

cando ti agatas in netzessidade:

fintza pro aer unu documentu

ti iscriet sa calta ‘e identidade.

E si no tenes cussa, tene a notu,

no ses che Marieddu riconnotu.

Cantadores a poesia.

ztaramonte — Fri, 04 Jul 2008 09:42:46 +0000

Inizio subito scusandomi con i lettori, per gli errori che si potranno incontrare durante la lettura di questi versi, ma la passione verso la poesia cantata è talmente forte, che devo condividere con voi questo materiale a dir poco storico.

Le gare poetiche sono state in passato, e forse fino a qualche decennio fa, le manifestazioni linguistico-culturali più rappresentative ed importanti dei sardi. L’origine dell’improvvisazione non è individuabile temporalmente, ma lo è invece quella delle gare: la prima gara si svolse a Ozieri nel 1896 in occasione dei festeggiamenti della Madonna del Rimedio. L’ideatore fu il famoso poeta locale Antonio Cubeddu (Ozieri 1863 – Roma 1955). Da allora l’abilità nell’improvvisare, che era presente in tutte le occasioni di aggregazione sociale, matrimoni, fidanzamenti, tosatura delle pecore, uccisione del maiale, vendemmia e altro, con la geniale intuizione del Cubeddu fu portata sui palchi, nelle feste dell’isola e nelle più importanti manifestazioni dei concorsi poetico-letterali della Sardegna.

Queste le origini delle gare poetiche, nei prossimi articoli, quando ci riavvicineremo a questo tema continueremo a parlare della storia delle gare negli anni successivi.

Ora vorrei offrirvi l’“Esordio”, della gara disputata a Cagliari il 7 aprile del 1979 tra il nostro poeta locale Juanne Seu (Chiaramonti 1915 – 1998) e il poeta Mario Masala (Silanos 1935); in articoli successivi saremo in grado di pubblicare tutta la gara al completo, che contiene i temi “Sa peràula, s’iscritura” e “Sardigna indipendente, Sardigna italiana”.

Oltre i versi, troverete ogni dieci ottave, un lettore mp3 che vi consentirà di sentire la registrazione della gara. La necessità di dividere la registrazione in tre parti, è unicamente una mia scelta, dovuta al fatto che con spezzoni di files più piccoli, sono agevolati all’ascolto anche gli utenti con linea non ADSL. vi consiglio di avviare il lettore prima di iniziare la lettura dei versi.

Buon ascolto e buona lettura.

Carlo Moretti

ESÒRDIU

1. Màsala

Cand’in Casteddu intesu azis a mie

fimis in-d-una sala in sa fiera

e dae cando apo cantadu inie

ch’at passadu unu mese e calchi sera.

Tando in s’ierru e como in primavera

de che torrare est bénnida sa die.

E istanote sa manu dae su coro

bo la istringo in via Logudoro.

2. Seu

Cando fia ‘e como pius giovanu

tantas boltas cantadu ap’in Casteddu

ma dae tando su pilu nieddu

in conca mia est diventadu canu,

poi su fritu malu ‘e su ‘eranu

mi at mesu guastu su faeddu.

Chi totu bos cuntente no m’illudo

ma nessi a boghe mala bos saludo.

3. Màsala

Cun Zizi e cun Pazzola in bonumore

cussa gara amus fatu che unu jogu:

m’iscazaia, aggiummai, in suore

chi mi paria a cultzu a su fogu

cun zente meda e cun sala minore

pruite bi tenimis pagu logu.

Istanote mi paret diferente

chi ch’amos sala manna e paga zente.

4. Seu

Si zente paga ch’amus istanote

no at a esser tzeltu una cundanna.

No ti nde tremes, Mario, che canna

a su mancu su diciu tene in dote

ca si b’at paga zente e cheja manna

nachi no crebat unu satzeldote.

Inoghe si est minore su fiotu

mancari paga che passat etotu.

5. Màsala

Si amus unu nóbile talentu

no semus de sos pópulos sos magos.

Ma si si cantat no mancat disvagos,

est un’iscena de divertimentu.

Pro gai a boltas semus puru in pagos

e sun in pagos de malu acuntentu.

Paret chi s’impossìbile domanden

ma isperamos chi chito si ch’anden.

6. Seu

Si no ch’amus presente zente meda

no ti siat pro s’ànima ferida.

E permitti ‘e ti narrer chi proveda

si zente meda no est arrivida

ca si in busciaca an calchi moneda

si la sun arribbende a sa paltida.

Ca sa paltida est pius impoltante

chent’oltas prus de su sardu cantante.

7. Màsala

O caru Seu, a mie ti afianca

in sa nostra poética disputa.

Calchi ‘olta m’intendo ‘e mala muta,

sa cara mia diventat bianca.

Pro chi sos ojos che los punte a suta

ja ist’attentu sempre a s’ala manca.

E no ch’apo sos chelveddos in sa nue

ca chie mi preócupat ses tue.

8. Seu

Lass’istare a un’ala su chighinu

si sa zente abbarrada ch’est lontanu.

Tue prosighi su tou caminu

si cun megus t’an postu manu-manu:

ca chie ischit nadare in s’oceanu

podet nadare puru in su trainu.

E no nde tenet contu ‘e sa digrascia

pro chi b’at abba russa o abba bascia.

9. Màsala

Seu, ca mi connosches ti nde abbizas

chi no m’agato in mesu ‘e sa brajas.

Ses tue chi sos pópulos ammajas

e sos pius giovànos los consizas.

Ma deo poto cantare pro mizas

e pro deghinas e pro chentinajas

ma est a bier su casceri, o Seu,

si cundividit su parere meu.

10. Seu

Cando tenia pius fantasia

sa zente la ponia in bonumore.

A da chi fia gióvanu in fiore

tenia calchi pagu ‘e melodia

ma oe tue ses s’ammajadore

pruite ses ancora in pitzinnia.

Ca‘s musa frisca e as limba arrodada,

s’edade mia invece ch’est passada.

11. Màsala

Deo puru a cantare mi b’aggiusto

antzis cando mi càpitat m’apento.

Pius bi canto e pius ingusto

cando subra su palcu mi presento.

Si zente meda b’at mi nde cuntento,

si sun in pagos invece m’assusto.

Siat normale o no siat normale,

osselva it’arratza ‘e naturale.

12. Seu

Da vint’annos in giru ses bessidu

ca as semenadu in Saldigna fiores.

Deo ja so cunvintu chi as retzidu

tantas delusiones e onores.

Deo coment’e tue nde apo ‘idu

pópulos mannos, pópulos minores.

Ma in su palcu seguru mi sento:

ista seguru chi no mi lamento.

13. Màsala

Làssami sas ispinas e fiores

de cosas gai no mi nde presentes.

Como no apaltenzo a sos minores

ca che a tie las giuto sas dentes.

Cando sun medas e incumpetentes,

cando sun pagos e intendidores:

ti curreggen si ti dés male esprìmere

e duncas sun sos pagos sos de tìmere.

14. Seu

A pones mente e cantas volonteri

postu ‘e fronte a sos ch’inoghe sunu

ca est cussu su tou mestieri

a da chi su momentu est oportunu.

Si a si lamentare bi nd’at unu

si devet lamentare su casceri

ca si sa zente si ch’essit a fora

devet pagare a da chi ‘enit s’ora.

15. Màsala

Eo no naro chi semus sos assos

ne-i sos cignos ne sos rusignolos.

Sos versos chi cantamos ch’essin solos,

nos nde capitat bonos e iscassos.

Però no conto a sos primos passos

ne ap’a esser a sos ùltimos bolos.

E m’augùro cun sa modéstia mia

ch’a t’istare a fiancu dignu sia.

16. Seu

Tue sa musa bella, frisca e rara

pensa a ponner in motu, caru Màriu.

Totu su ch’as de narrer nara in cara

pro chi siat su pòpulu contràriu.

Su ch’at organizadu custa gara

deo ap’intesu ch’est millionàriu.

Antzis inoghe seguru mi palzo

però ch’est sa Finantza e no nde nalzo.

17. Màsala

Ajò, caru Juanne, e arrejona

s’a fagher su dovere ses amante.

Sa natura t’at dadu parte ‘ona

e ja ch’as a bessire triunfante

Ja chi como’e sas terras de s’Anglona

ses tue solu su rapresentante

ca sos àteros moltos si che sunu

ma bales cant’e chentu essende unu.

18. Seu

Cando s’Anglona ti leas a giogu

chi tenzas sa rejone non ti ‘antes.

Como no est cust’arte disaogu

ca miminende sun sos iscultantes.

Poi ja l’ischis chi sos diletantes

si che sunu molzende in dogni logu.

E gai at a sutzeder in Silanos

ca a bisu meu bi at duos giovànos.

19. Màsala

Sa poesia sa Saldigna istimat

ch’est antigu unu bonu documentu.

A chie rimat a chie no rimat,

sos poetas sun sempre in aumentu:

bi pigan a su palcu fina in chentu

però de chentu unu no nde frimat

ca sa natura che mama est maligna

mi paret sempre contr’a sa Saldigna.

20. Seu

Oe sa poesia saldignola

a mie paret in perditzione,

ma chi sunu fatende cust’iscola

in logu meu sunu unu massone.

Sale, Piredda, Sozu cun Budrone,

e b’est Juanne Seu cun Pazzola

ch’ancora in palcu rèndene disvagos:

sun in sa terra tua pius pagos.

21. Màsala

O Seu chi mi ses a su fiancu,

ja ischis ite nâmos a sa zente:

chi da degh’annos a s’annu presente

in chimbe o sese ja semus de mancu.

Ma sa poesia ‘essit da sa mente

e mai no s’aprendet in su bancu.

Tue mi naras chi faghen iscola

ma cando b’est su donu naschet sola.

22. Seu

Tue primu m’as nadu in poesia

chi est s’Anglona peldende s’ispera.

Ma permiti chi narrer ti cheria

chi nois nd’amus tentu un’ischiera

pruite mastros de sa poesia

in nois bi nd’at nàschidu in dogn’era.

Ma sos chi sunu in sa ‘ostra dimora

sun piantas batidas dae fora.

23. Màsala

O caru Seu, faghe atentzione,

no comintzes a arrejonare male

ca s’est unu talentu naturale

no s’imparat in-d-una letzione.

Veramente a su nord de sa regione

b’at como unu cumplessu industriale

inube bos l’an s’ària infetta

e no bi naschet mancu unu poeta.

24. Seu

Lass’istare s’indùstria de zona

e faeddamos de àteru impreu

pruite sas terras de Juanne Seu

an tentu in poesia sorte ‘ona

ca sos poetas de su logu meu

dae meda onoradu an s’Elicona.

Bois invece a su Parnasu saldu

bi sezis arrivados tropu taldu.

25. Màsala

No so in chilca ‘e ti leare in giru

e mancu dare ti chelzo consolos.

Ma tra antzianos cun sos noitolos

sun totu cantos batende retiru.

Sa Saldigna est piena ‘e fumajolos

chi nos est anneghende su respiru.

E d’ogni cosa bella e naturale

est sempre andende dae peus in male.

26. Seu

Bastan como sas nostras chistiones

ca s’arrejonu l’abbandono igue.

Preghemus, Marieddu, deo e tue

chi nascat in Sardigna campiones

ca da meda aumbrada cussa nue

e sun morinde sas traditziones.

Est meztus giovanottos chi si moven

e sas cosas antigas las rinnovene.

27. Màsala

Caru Juanne, ti uso rispetu

ca apo sempre usadu galateo.

Ma como ti cunfido unu segretu

e chi mi dias iscultu lu creo:

non so deo ‘e nde nascher in s’isetu,

s’interessante est chi no molza deo.

Ca si ’nde naschet e and’eo in tramontu

e chi ’nde nascat no m’est torracontu.

28. Seu

Si sa lógica aias tentu a notu

aias tentu un’àteru oriolu.

S’’idet chi ‘e sos collegas no as dolu

si cheres chi s’istruat su fiotu.

Si pro digrascia morzèrana totu

ja non podes cantare si ses solu

e istadi mudu a die e a de notte

dezzis non cantes cun su satzerdote.

29. Màsala

Ist’atentu comente la cumbinas

ca cummitinde mi pares reatos.

E isparidas sun sas disciplinas

cun su morale in totas bator latos.

Oramai est un’era de rapinas,

de furtos e de drogas e ricatos.

Sun cosas chi cumbinan e imparan

e si faeddas de gara t’isparan.

30. Seu

S’Itàlia est piena ‘e chistiones

ch’abbòghinana in tottu sas istradas

e bidimus sas testas infogadas

chi in giru si l’avian a masones:

cussas podian esser reguladas

como chi b’amus sas eletziones.

Pruite contan isperàntzia molta

si l’isbagliamus puru custa ‘olta.

31. Màsala

Ma fininimus s’esórdiu, Juanne,

ca mi paret ch’est ora ‘e la finire.

Non penses chi sos gióvanos cundanne,

cuss’errore non poto permitire.

Ma dia cherrer chi mancu m’inganne:

tue t’as a sighire a ispilire

e ti restat sa conca neta-neta

sena pigare a palcu unu poeta.

32. Seu

S’a s’esórdiu serras sos gancellos

deo puru lu lasso a una perra.

Ma mira sos ingannos e tranellos

ch’est s’Itàlia nostra tota in gherra

e a fortza e puntiglias e buldellos

che amus su guvernu ‘etadu in terra.

Como prega pro s’Itàlia intrea

chi unu ‘onu nde ponzan in cadrea.