Goso pro Santu Mateu.

Scritto da ztaramonte

Pubblico con piacere questa poesia, direi estemporanea, che “Angelu ‘e sa Niera” ha scritto e mi ha inviato.

Ben’apidu Carolu, apo fatu custu goso ca ido chi si cras pioede, cheret narer chi Santu Mateu est tristu e tando bisonzat de l’invocare cun custu goso iscritu sigundu su comitadu rezionale de Sardigna.
Amezuvidere
Anghelu ‘e sa Niera

Goso pro Santu Mateu

Tristu ést Santu Mateu
De Tzaramònte protetore
Ca òfesu amus Deu
Curumpende nos su core

Sos pecados de ognunu
Han fatu meda disastru
E no restada a perunu
che penare subr’a crastru

Pro espiare  sos erores
C’amus fatu in cust’anada
Purifichemus nos sos cores
Cun s’amenda conotada

Chisà chi a Santu Matteu
Li s’amodighed su coro
E invochet  pro nois Deu
E benzan dies de oro

Tzertu est chi a Tzaramonte
Tzente meda est pecadora
Andan totu ad alta fronte
Cando pecan’in d’ognora

Totus sos cumandamentos
Suni meda  violados
E senza sos sacramentos
No che ogamus sos pecados

Sos omines pecadores
Pasan’ inant’ a sa cheja
E bolende che astores
Andan a sa rea pecheja

Setzidos in s’isradone
Moven limba pudidosa
Finza su pius mandrone
Ad’ a  narer calchi cosa

Frimos e barcamunderis
Faghen’a gara a faedare
Male de totu sos prìderis
e su Paba a criticare

Bisuni finza  sos ladros
Chi lean crabas e anzones
Cando pasculan’in  padros
e los benden’ a  masones

Totu naran chentu faulas
Subra su bonu cristianu
E juran finz’in sas  taulas
Falsidades de ogni manu

Guasi totu Tzaramonte
Non si salvat mancu mortu
Lean sa rughe in sa fronte
Ponendesi a coddu tortu

Che i Sodoma e Gomora
Finit tzertu Tzaramonte
Si Mateu cun sa petora
No si faghet  sin’ in fronte

E perdonu nos dimandat
A Deus misericordiosu
Pro chie torat e chie andat
In caminu perigliosu

O Mateu gloriosu
Salva nos da-i- s’inferu
E nos dona meda  gosu
Cand’ ad’at bener s’interu

Sos pecados pianghimus
In penitentzia e in dolore
A tie ogni votu faghimus
Nostru santu protetore.

Anghelu ‘e sa Niera

Condividi su Facebook